जपानमध्ये मोदी-ट्रम्प यांची भेट; महत्त्वाच्या ४ मुद्दयांवर चर्चा

ओसाका (जपान)

पंतप्रधान नरेंद्र मोदी आणि अमेरिकेचे राष्ट्राध्यक्ष डोनाल्ड ट्रम्प यांची जपानमधील ओसाका येथील जी-२० शिखर संमेलनात भेट झाली. या वेळी पंतप्रधान मोदी यांनी व्यापार, संरक्षण, ५जी कम्युनिकेशन्स नेटवर्क अशा महत्त्वाच्या मुद्द्यांवर चर्चा केली. भेटी दरम्यान ट्रम्प यांनी लोकसभा निवडणुकीत विजय प्राप्त केल्याबद्दल पंतप्रधान मोदी यांचे अभिनंदनही केले. या नंतर दोन्ही नेत्यांची जपानचे पंतप्रधान शिंजो आबे यांच्यासोबतही बैठक झाली.

पंतप्रधान मोदी यांनी लोकसभा निवडणुकीत मिळवलेला विजय हा मोठा विजय असल्याचे सांगत ट्रम्प यांनी पंतप्रधान मोदींचे अभिनंदन केले. मोदी पहिल्यांदाच निवडणुकीत उतरल्यानंतर त्यांना एकाचवेळी अनेक पक्षांशी लढावे लागले. या वेळी मात्र मोदींविरोधात सर्व विरोधक एकत्र येऊन लढले. हा विजय म्हणजे मोदी यांच्या अद्भुत क्षमतेचे एक उदाहरण आहे, अशा शब्दांत ट्रम्प यांनी मोदींचा गौरव केला.

भारत आणि अमेरिकेचे संबंध अधिक चांगले बनले असून या दोन्ही देशांदरम्यानची मैत्री आम्ही एका वेगळ्याच उंचीवर नेऊन ठेवण्यासाठी कटिबद्ध आहोत, अशा भावनाही ट्रम्प यांनी व्यक्त केल्या. मी आणि मोदी चांगले मित्र बनलो आहोत. दोन्ही देश इतके जवळ कधीच आलेले नव्हते. आम्ही लष्करासह इतर अनेक क्षेत्रांमध्ये एकत्र येऊन काम करू. या परिषदेत आम्ही भारताशी व्यापारावर चर्चा करणार आहोत, असे ट्रम्प यांनी सांगितले.

पंतप्रधान मोदी ट्रम्प यांचे आभार मानत म्हणाले, 'आम्ही लोकशाही आणि शांततेसाठी कटिबद्ध आहोत. 'सबका साथ, सबका विश्वास' हा आमचा मंत्र आहे. आम्ही मेकइम इंडिया या मंत्रासह पुढे जात आहोत. आपण भारताप्रति प्रेम व्यक्त केल्याबद्दल मी आपला आभारी आहे. दोन देशांदरम्यान ४ प्रमुख मुद्द्यांवर चर्चा होणार आहे. यात ईराण, ५जी, संरक्षण, द्विपक्षीय संबंध या विषयांचा समावेश आहे'.