‘पोकेमॉन गो’चा सुरक्षेला धोका

अनेक देशांमध्ये गेमवर बंदी

वृत्तसंस्था, न्यूयॉर्क

जगभरातील तरुणाईला वेड लावलेला ‘पोकेमॉन गो’ या आठवड्यात आणखी २६ देशांत वैधपणे पोहोचलेला असताना दुसरीकडे सुरक्षायंत्रणा आणि धार्मिक संघटना मात्र त्याला विरोध करत आहेत. सौदी अरेबियामध्ये धर्मगुरूंनी याविरोधात फतवा काढला असून तो इस्लामविरोधी असल्याचे जाहीर केले आहे. बोस्नियाने पोकेमॉनचा पाठलाग करताना भूसुरूंगांची काळजी घेण्याचे आवाहन केले आहे. तर, इजिप्तच्या अधिकाऱ्यांनी सुरक्षा विषयक महत्त्वाच्या ठिकाणांचे फोटो आणि व्हिडीओ पोस्ट केल्यामुळे सुरक्षेला धोका पोहोचत असल्याने त्यावर बंदी घालावी, असे म्हटले आहे. रशियाने याबद्दलचा भयंकर परिणामांचा इशारा दिला आहे.

या गेममध्ये एरवी लोक जिथे जात नाहीत, अशा ठिकाणांना भेटी द्याव्या लागतात. यातून अनेक ऐतिहासिक ठिकाणे आणि सुरक्षा यंत्रणांच्या इमारतींचा समावेश आहे. याला पोकेस्टॉप म्हणतात. यातील खेळाडू पोकेमॉन पकडतात आणि वेगवेगळ्या टीम्सकडून त्यांच्यात लढाया करवतात. ‘पोकेमॉन पृथ्वीच्या प्रत्येक कोपऱ्यात सापडतात,’ असा संदेश तो गेम डाऊनलोड करताना येतो आणि या गेमची नेमकी तीच समस्या आहे.

गुप्तहेर यंत्रणांद्वारे हे टूल वापरले जाते, अशी माहिती इजिप्तच्या संरक्षण आणि सुरक्षा समितीचे हमिदी बखीत देतात. कुवेतने या गेमवर बंदी घातली आहे. इंडोनेशियात एका फ्रेंच नागरिकाला लष्करी तळावर अटक झाली. आपण पोकेमॉन गेममधील कॅरेक्टर शोधत होतो, असे त्याचे म्हणणे आहे. इस्रायली अधिकाऱ्यांनी त्यांच्या सैनिकांना हा गेम न खेळण्याचा इशारा दिला आहे. दक्षिण कोरियाच्या अधिकाऱ्यांनी या खेळासाठी गुगल मॅप वापरण्यास बंदी घातली आहे.