लोगो : पृथ्वीरक्षण
वृत्तसंस्था, पॅरिस
'जीवाश्म इंधानापासून होणाऱ्या प्रदूषणामुळे जगाची रोज सुमारे आठ अब्ज डॉलरची हानी होत आहे. ही रक्कम एकूण दैनदिन जागतिक उत्पन्नाच्या ३.३ टक्के आहे,' माहिती सेंटर फॉर रिसर्च ऑन एनर्जी अँड क्लीन एअर (सीआरइए) आणि ग्रीनपीस साउथईस्ट आशिया या पर्यावरण विषयात काम करणाऱ्या संस्थांच्या अभ्यासातून समोर आली आहे.
या संस्थांच्या वतीने खनिज तेल, गॅस आणि कोळशाच्या इंधन म्हणून वापर केल्याने जगभरात होणाऱ्या हानीचा अभ्यास करण्यात आला आहे. जीवाश्म इंधनाचा सर्वांधिक वापर चीनमध्ये होत असून, त्या खालोखाल अमेरिका आणि भारताचा नंबर लागतो. चीनमध्ये होत असलेल्या जीवाश्म इंधनाच्या वापरामुळे वार्षिक ९०० अब्ज डॉलर, अमेरिकेत होत असलेल्या जीवाश्म इंधनाच्या वापरामुळे वार्षिक ६०० अब्ज डॉलर आणि भारतात होत असलेल्या जीवाश्म इंधनाच्या वापरामुळे १५० अब्ज डॉलरची वार्षिक हानी होत आहे, असेही या संस्थांच्या अहवालात म्हटले आहे. या शिवाय जीवाश्म इंधनाच्या ज्वलनातून दर वर्षी जगभरात ४५ लाख जणांचा अकाली मृत्यू होत आहेत. या ४५ लाखांमध्ये चीनमध्ये होणाऱ्या १८ लाख जणांचा आणि भारतात होणाऱ्या एक लाख जणांचा अकाली मृत्यूचा समावेश आहे.
दरम्यान, जागतिक आरोग्य संघटनेने जाहीर केलेल्या नव्या आकडेवारीनुसार जमिनी लगत होणाऱ्या हवेच्या प्रदूषणामुळे दर वर्षी जगभरात ४२ लाख जणांचा हृदयरोग, हृदयविकाराचे झटके, फुफ्फुसाच्या कर्करोगाने मृत्यू होत आहे, मृतांमध्ये मुलांचा समावेश मोठ्या संख्येने असते. दिल्लीत एक दिवस राहिल्यास दहा सिगारेट ओढल्या इतके शरीराचे नुकसान होते आहे.
ग्रीनपीस ईस्ट आशियाचे स्वच्छ हवा प्रचारक मिंवू सोन म्हणाले, 'जीवाश्म इंधनाच्या वापरामुळे होणाऱ्या वायू प्रदूषणामुळे लाखो लोकांचा मृत्यू होत असून, अनेक ट्रिलियन डॉलरची हानी होत आहे. २०१८मध्ये सुमारे २.९ ट्रिलियन डॉलरची हानी झाली आहे. त्यामुळे आपल्याला स्वच्छ आणि अपारंपरिक ऊर्जेचा वापर वाढविला पाहिजे.'