अमेरिकेत शूटिंगदरम्यान प्रियांका जखमी

मटा ऑनलाइन वृत्त । न्यूयॉर्क

अमेरिकेतील प्रसिद्ध टीव्ही शो 'क्वांटिको'च्या सेटवर शूटिंग सुरू असताना झालेल्या अपघातात अभिनेत्री प्रियांका चोप्रा जखमी झाली असून तिला तातडीने रुग्णालयात दाखल करण्यात आले होते व उपचार करून डिस्चार्जही देण्यात आला आहे, असे 'एबीसी'च्या निर्मात्यांच्या टीमकडून सांगण्यात आले.

स्थानिक वेळेनुसार गुरुवारी ही घटना घडली. 'क्वांटिको'तील एक स्टंट दृश्य चित्रीत करत असताना प्रियांकाचं डोकं जमिनीवर आदळलं व तिला इजा झाली, असे 'एबीसी'ने सांगितले.

प्रियांकाला सुरुवातीला काही तास अतिदक्षता विभागात ठेवण्यात आले होते त्यानंतर तिला सामान्य वॉर्डमध्ये हलवण्यात आले. तिथून आता तिला डिस्चार्ज देण्यात आला आहे व ती विश्रांती घेत आहे, असे त्यांनी नमूद केले. डॉक्टरांनी प्रियांकाला आठवडाभर विश्रांतीचा सल्ला दिला असून यादरम्यान तिला शूटिंगपासून दूर राहावं लागणार आहे.