'कोविड-१९' वुहानमध्ये निर्माण केल्याचे पुरावे द्या; चीनचे आव्हान

बीजिंग: कोविड-१९ विषाणू चीनमधील वुहान शहरातील प्रयोगशाळेत निर्माण केला गेला, या दाव्याचे पुरावे अमेरिकेचे राज्यांचे सचिव माइक पॉम्पिओ यांनी सादर करून दाखवावेत, असे आव्हान चीनकडून बुधवारी देण्यात आले. पॉम्पिओ यांच्याकडे असे कोणतेही पुरावे नाहीत, असेही चीनने म्हटले आहे.

३ मे रोजी पॉम्पिओ यांनी म्हटले होते की, 'वुहानच्या इन्स्टिट्यूट ऑफ व्हायरॉलॉजीमध्ये करोनाची व्युत्पत्ती झाली, याचे बक्कळ पुरावे आमच्याकडे आहेत. चीनमध्ये नक्की काय घडले, याचा अभ्यास करण्यासाठी आंतरराष्ट्रीय शास्त्रज्ञांना तिथे येऊ देण्यास चीनने नकार दिला.'

'पॉम्पिओ यांनी 'बक्कळ पुरावे' असल्याचे म्हटले आहे. मग त्यांनी ते दाखवावेत,' असे चीनच्या परराष्ट्र मंत्रालयाचे प्रवक्त्या हुआ चुनयिंग यांनी प्रसारमाध्यमांशी बोलताना सांगितले आहे. 'हे प्रकरण राजकारण्यांनी नव्हे; तर शास्त्रज्ञांनी हाताळायला हवे. जागतिक आरोग्य संघटनेनेही (डब्लूएचओ) सांगितले आहे, की अमेरिकेने आपल्या दाव्यांना पुष्टी देणारे पुरावे अद्याप सादर केलेले नाहीत,' असेही त्या म्हणाल्या. 'अमेरिकेसह अनेक देशांतील वरिष्ठ शास्त्रज्ञांच्या मतानुसार, हा विषाणू निसर्गातून आलेला आहे. हा मानवनिर्मित नाही किंवा प्रयोगशाळेमधून बाहेर पडल्याची शक्यता नाही. करोनाचे रुग्ण काही देशांमध्ये गेल्या सप्टेंबर; तसेच डिसेंबरमध्येही सापडल्याचे अहवाल आहेत. ताज्या अहवालानुसार, गेल्या वर्षी ऑक्टोबरमध्ये अमेरिकेत तर डिसेंबरमध्ये फ्रान्समध्ये करोना रुग्ण सापडला आहे,' असेही त्या म्हणाल्या.

वाचा: करोना व्हायरस वुहानच्या लॅबमधूनच बाहेर आला; अमेरिका ठाम
वाचा: स्पॅनिश फ्लू आणि करोनाच्या साथींमध्ये 'ही' साम्ये!

पर्यटकांची गर्दी

लॉकडाउन टप्प्याटप्याने शिथिल केल्यानंतर बीजिंगमध्ये गेल्या पाच दिवसांमध्ये मोठ्या प्रमाणावर पर्यटकांची गर्दी उसळल्याचे चित्र आहे. गेल्या काही दिवसांत ४६ लाखांपेक्षा जास्त चीनमधील पर्यटकांनी बीजिंगला भेट दिल्याचे वृत्त 'चायना डेली'ने दिले आहे.

आणखी वाचा:
युरोपात ब्रिटनमध्ये करोनामुळे सर्वाधिक मृत्यू
ब्रिटनचा शास्त्रज्ञ गर्लफ्रेंडला भेटला; राजीनामा द्यावा लागला
सकारात्मक बातमी! करोनावर लस सापडली; इटलीचा दावा