विरोधकांच्या कार्यालयांवर रशियात छापे

वृत्तसंस्था, मॉस्को: रशियाच्या सरकारी तपास यंत्रणांकडून मंगळवार सकाळपासूनच विरोधी पक्षांच्या देशभरातील कार्यालयांवर छापे टाकण्यात आले. सरकारवर टीका करणाऱ्यांवर दबाव आणण्यासाठी हे पाऊल उचलले गेल्याचा दावा रशियातील विरोधी पक्षांनी केला आहे.

सकाळी सहा वाजल्यापासूनच देशभरातील सुमारे ३० कार्यालयांवर छापे टाकण्यात येत असल्याचे ट्विट विरोधी पक्षनेते अॅलेक्सी नॅवल्नी यांनी केले. आठवडाभरापूर्वीच रशिया सरकारने नॅवल्नी यांच्या 'अँटी करप्शन फाऊंडेशन'ला परदेशी हस्तक म्हणून घोषित केले होते. रशियातील कायदा अंमलबजावणी यंत्रणेतर्फे भ्रष्ट सरकारी अधिकारी आणि लाचखोरांना संरक्षण देण्यासाठी सर्वतोपरी प्रयत्न केले जात असल्याची टीकाही त्यांनी केली आहे.