अरेरे! हव्यासाने घेतले दुर्मिळ दोन पांढऱ्या जिराफांचे बळी!

वर्ष २०१७ मध्ये माध्यमांमध्ये दोन जिराफांची जोरदार चर्चा सुरू होती. या दोन जिराफांचा रंग इतर जिराफांपेक्षा वेगळा होता. जिराफ म्हटले की उंच असणारा, पिवळसर रंग, त्यावर काळसर तांबूस रंगाची विविध आकाराची व आकारमानांची आकृती असणारा शाकाहारी प्राणी डोळ्यासमोर येतो. मात्र हे जिराफ पांढऱ्या रंगाचे होते. जगातील दुर्मिळ जिराफांपैकी एक जिराफ होते त्यामुळे त्यांची अधिक चर्चा होती. केनियातील अभयारण्यात २०१६ मध्ये पांढरे जिराफ पहिल्यांदा आढळले होते.

एकूण तीन पांढरे जिराफ होते. त्यातील मादी आणि त्याच्या पिल्लाची शिकाऱ्यांनी हत्या केली आहे. त्यामुळे आता एकच पांढरा जिराफ उरला आहे. वनविभागाच्या अधिकाऱ्यांना उत्तर-पूर्व केनियातील गरिसा काउंटी गावात मादी आणि पिल्लूचा मृतदेह आढळला. या पांढऱ्या जिराफांची शिकार कोणी केली हे अद्याप समोर आले नाही. शिकार करणाऱ्यांबाबत चौकशी सुरू असल्याची माहिती अधिकाऱ्यांनी दिली. जिराफांचे मांस, चामडे यांना आंतरराष्ट्रीय बाजारात किंमत असते. त्यामुळे जिराफांची हत्या झाली असल्याचा संशय व्यक्त करण्यात येत आहे.

'इशाकबीनी हिरोला वन्यजीव संरक्षण' विभागाचे व्यवस्थापक मोहम्मद अहमदनूर यांनी सांगितले की, ठार करण्यात आलेल्या दोन्ही जिराफांना तीन महिन्यांआधी पाहण्यात आले होते. दोन जिराफांची शिकार ही केनियासाठी दु:खद असल्याचे त्यांनी सांगितले. संपूर्ण जगात फक्त केनियातच हे पांढरे जिराफ आढळत असल्याची माहिती त्यांनी दिली. हे पांढऱ्या रंगाचे जिराफ पर्यटकांचे खास आकर्षण होते. या ठिकाणी पर्यटकांची संख्या वाढवण्यासाठी पांढऱ्या जिराफांची महत्त्वाची भूमिका होती.

‘आफ्रिका वाइल्डलाइफ फाउंडेशन’ने दिलेल्या माहितीनुसारे, मागील ३० वर्षातजिराफांच्या संख्येत मोठी घट झाली आहे. जिराफांच्या संख्येत जवळपास ४० टक्के घट झाली आहे. मांस आणि चामड्यासाठी जिराफांची हत्या करण्यात येत असल्याची माहिती फाउंडेशनने दिली. वर्ष १९८५ मध्ये जिराफांची संख्या १ लाख ५५ हजार होती. तर, २०१५ च्या आकडेवारीनुसार ही संख्या आता ९७ हजार इतकी असल्याची माहिती पर्यावरण वन्यजीव संरक्षणासाठी कार्यरत असलेल्या 'आययूसीएन'ने दिली.

जिराफ हे पिवळसर रंग, त्यावर काळसर तांबूस रंगाची विविध आकाराची आकृती असणारे असतात. मात्र, पांढरे जिराफ वेगळे असतात. हे जिराफ पांढरे का असतात? तर, एका आजारामुळे हे जिराफ पांढरे असतात. ल्यूसलिज्म नावाच्या अनुवांशिक आजारामुळे हे जिराफ पांढरे असतात. या आजारात त्वचा पेशींची पिग्मेंटेशन (त्वचेचा मूळ रंग नसणे) प्रकिया थांबवते. ल्यूलिज्ममध्ये जिराफाच्या डोळ्याजवळ काळा रंग आढळतो. त्यामुळेच या पांढऱ्या जिराफांची गणना दुर्मिळ प्रजातीत होत असते.