इराक: लष्करी तळावर रॉकेट हल्ला; तीनजण ठार

बगदाद : इराकची राजधानी बगदादच्या उत्तरेतील लष्करी तळावर रॉकेट हल्ला करण्यात आला. या हल्ल्यात अमेरिकेचे दोन आणि एक ब्रिटीश नागरिकाचा मृत्यू झाला. मृतांमध्ये एका सैनिकाचा समावेश आहे. अमेरिकेच्या अधिकाऱ्याने ही माहिती दिली असून बगदादच्या उत्तरेस ताजिया येथील लष्करी तळावर रॉकेट हल्ला करण्यात आला.

'एबीसी'च्या वृत्तानुसार, अमेरिकन लष्कराचे मुख्य प्रवक्ते माइल्स कॅगिन्स यांनी सांगितले की, इराकच्या ताजिया जिल्ह्यातील लष्करी तळावर १५ रॉकेट डागण्यात आले. यासंदर्भात त्यांनी अधिक माहिती दिली नाही. तर, अन्य एका अधिकाऱ्याने दिलेल्या माहितीनुसार, ट्रक लॉन्चरमधून ३० रॉकेट डागण्यात आले. त्यातील १८ रॉकेट लष्करी तळावर आले.



दरम्यान, हा रॉकेट हल्ला नेमका कुणी केला हे स्पष्ट झाले नाही. अन्य एका वृत्तानुसार हल्लेखोरांनी १५ कत्युशा रॉकेट्स डागले. या हल्ल्यात १२ हून अधिकजण गंभीर जखमी झाले आहेत. या हल्ल्यात तीन जण ठार झाले असून एक जण अमेरिकी सैनिक असून आणि दुसरा कंत्राटदार होता. या हल्ल्यातील मृतांचा आकडा वाढण्याची शक्यता वर्तवण्यात येत आहे. हा हल्ला पॉप्युलर मोबिलायझेशन फोर्सेस (पीएमएफ) या संघटनेने केला असल्याची शक्यता वर्तवण्यात येत आहे.

आणखी वाचा:
अरेरे! हव्यासापायी दुर्मिळ पांढऱ्या जिराफांचा बळी
करोना: वुहानमध्ये काही कंपन्या सुरू होणार