यूक्रेनचं रशियाला प्रत्युत्तर? रेल्वे पुलावर एअरस्ट्राईक, खवळलेल्या मॉस्कोची हल्ल्याची धमकी

मॉस्को : रशिया (Russia) आणि यूक्रेन (Ukraine) यांच्यातील युद्ध आता आणखी तीव्र होताना दिसत आहे. रशियानं यूक्रेनवर २४ फेब्रुवारीला आक्रमण केलं होतं. आता यूक्रेन रशियाला प्रत्युत्तर देण्यासाठी रणनीती बनवताना दिसत आहे. रशियामध्ये घुसून त्यांच्यावर हल्ला करण्याची योजना यूक्रेनची असल्याचं समोर येत आहे. यूक्रेनी सैन्य दलाची दोन हेलिकॉप्टर्स रशियात आली आणि त्यांनी रहिवासी ठिकाणी हल्ला केल्याचा आरोप केला आहे. या घटनेत काही नागरिक जखमी झाल्याचा दावा रशियानं केला आहे. तर, दुसरीकडे रशियाचा दावा यूक्रेननं फेटाळला आहे.
पुतीन यांची यूक्रेनवर अणवस्त्र हल्ल्याची धमकी, अमेरिका अ‍ॅक्शन मोडवर, १४ वर्षानंतर ब्रिटनमध्ये अणू बॉम्ब तैनात करणार
रशियानं यूक्रेनच्या सीमेला लागून असलेल्या बेलगोरोड आणि ब्रयान्स्क या दोन ठिकाणी हल्ला झाल्याचा दावा केला आहे. यूक्रेननं बेलगोरोडमधील रेल्वे पुलावर हल्ला करण्यात आल्याचा आरोप देखील रशियाकडून करण्यात आला होता. बेलगोरोडचे महापौर व्याशेसलेव ग्लादकोव यांनी यूक्रेननं केलेल्या हल्ल्यात कोणतीही जीवितहानी झाली नसल्याचं म्हटलंय. रेल्वे पुलाचं नुकसान झाल्याची माहिती व्याशेसलेव ग्लादकोव यांनी दिली आहे.

रशियामधील तो रेल्वे पूल यूक्रेनच्या डोनबासपासून ६.५ किमी अंतरावर आहे. रशियाकडून या रेल्वे मार्गावरुन सैन्याला लष्करी मदत पुरवली जात होती. त्यामुळं या हल्ल्यामुळं रशियाकडून यूक्रेनला जोरदार प्रत्युत्तर दिलं जाण्याची शक्यता आहे.यूक्रेनकडून बेलगोरोडमध्ये महिनाभरात दुसऱ्यांदा हल्ला करण्यात आला आहे. यापूर्वी रशियाच्या बेलगोरोडमधील ऑईल डेपोवर हल्ला करण्यात आला होता. यूक्रेनने त्यावेळी देखील हल्ला केल्याचं वृत्त फेटाळलं होतं.

रशियानं यूक्रेनच्या सैन्यावर ब्रयान्स्क गावात एअरस्ट्राईक केल्याचा आऱो केला आहे. यूक्रेनच्या दोन हेलिकॉप्टर्सनी ब्रयान्स्क मधील क्लिमोवो येथे रहिवासी भागात हल्ला केला आहे. ब्रयान्स्क यूक्रेनपासून ५५ किलोमीटरवर आहे. दोन हेलिकॉप्टर्सनी सहा वेळा हल्ला केल्याचा आरोप रशियन तपास यंत्रणांनी केला आहे. या हल्ल्यात ६ इमारतींचे नुकसान झालं आहे. तर, ७ लोक जखमी झाले आहेत. जखमींमध्ये २ वर्षांचा मुलगा, एक गर्भवती महिला आणि जेष्ठ नागरिकाचा समावेश आहे. रशियातील वृत्त संस्था टासने ब्रयान्स्कचे गव्हर्नर अॅलेक्झांडर बोगोमाज यांच्या हवाल्यानं ही माहिती दिली आहे.
अमेरिकेकडून यूक्रेनला 800 दक्षलक्ष डॉलरची लष्करी मदत जाहीर, जो बायडन यांची घोषणा
रशियाची यूक्रेनला धमकी रशियानं या हल्ल्यानंतर यूक्रेनला धमकी दिली आहे. रशियाच्या संरक्षण मंत्रालयानं आमच्या भागात यूक्रेनचं सैन्य हल्ले आणि तोडफोड करत असेल तर आम्ही त्याला उत्तर म्हणून कीव कमांड सेंटरवर हल्ला करु असा इशारा दिला आहे. कीव कमांड सेंटरमधून यूक्रेनचं सैन्य रणनीती तयार करत आहे.