सलमान रश्दी व्हेंटिलेटरवर; एक डोळा गमवावा लागण्याची भीती, यकृतालाही इजा

वृत्तसंस्था, न्यूयॉर्कः तरुणाने केलेल्या जीवघेण्या हल्ल्यात जखमी झालेले जगविख्यात लेखक सलमान रश्दी (७५) यांना व्हेंटिलेटरवर ठेवण्यात आले आहे. त्यांना एक डोळा गमवावा लागण्याची भीती असून, चाकूहल्ल्यामुळे त्यांच्या यकृताला इजा झाली आहे. रश्दी यांच्या एजंटने ही माहिती दिली.

मुंबईत जन्मलेले सलमान रश्दी यांना 'द सॅटनिक व्हर्सेस' या पुस्तकाच्या लिखाणानंतर गेली अनेक वर्षे इस्लामी कट्टरवाद्यांकडून जीवे मारण्याच्या धमक्या दिल्या जात आहेत. शुक्रवारी न्यूयॉर्क येथे आयोजित करण्यात आलेला कार्यक्रम सुरू होण्यापूर्वीच कार्यक्रमस्थळी अचानक घुसलेल्या एका २४ वर्षीय तरुणाने थेट मंचावर जाऊन रश्दी यांच्यावर चाकूचे वार केले. त्यांना तातडीने रुग्णालयात दाखल करण्यात आले. ते व्हेंटिलेटरवर असून, बोलू शकत नसल्याचे वृत्त 'द न्यूयॉर्क टाइम्स'ने रश्दी यांच्या एजंटच्या हवाल्याने दिले आहे. 'बातमी चांगली नाही. सलमान रश्दी यांना एक डोळा गमवावा लागण्याची भीती आहे. त्यांच्या हाताच्या नसा तुटल्या असून, चाकूहल्ल्यामुळे त्यांच्या यकृताला इजा झाल्या आहेत', अशी माहिती रश्दी यांचे एजंट अँड्रयू वायली यांनी 'द न्यूयॉर्क टाइम्स'ला दिली.

स्थानिक वेळेनुसार, शुक्रवारी सकाळी १०.४७ वाजता रश्दी यांच्यावर हल्ला झाला. त्यानंतर काही क्षणांतच प्रेक्षकांमधील एका डॉक्टरने त्यांच्यावर प्राथमिक उपचार सुरू केले. तोवर तिथे दाखल झालेल्या आपत्कालीन वैद्यकीय पथकाने रश्दी यांना हवाईमार्गे स्थानिक ट्रॉमा सेंटरमध्ये नेले. तिथे संध्याकाळी ५च्या सुमारास त्यांच्यावर शस्त्रक्रिया करण्यात आली, अशी माहिती न्यूयॉर्क राज्य पोलिस दलातील मेजर यूजीन स्टॅनिझेव्स्की यांनी शनिवारी दिली.