वृत्तसंस्था, वुहान
चीनमधील वुहान प्रांतातील नागरिकांना मोठ्या संख्येने 'सार्स'सदृश विषाणूची लागण झाली आहे. अतिशय संसर्गजन्य असलेल्या या विषाणूने उद्भवलेल्या विविध आजारांमुळे आत्तापर्यंत चार जणांचा मृत्यू ओढवला असून, विषाणूचा प्रादुर्भाव झालेल्या रुग्णांची संख्या जवळपास २२५पर्यंत पोहोचली आहे.
नववर्षाच्या सुट्ट्यांचा काळ असल्याने चीनमध्ये सध्या पर्यटन हंगाम सुरू आहे. सर्वच मोठ्या शहरांमध्ये गर्दी वाढू लागली आहे. यंदाच्या सुट्टीत किमान ३ अब्ज चिनी नागरिक पर्यटन करतील, असा अंदाज आहे. त्यामुळे हा संसर्गजन्य विषाणू वेगाने पसरेल, अशी भीती व्यक्त होत आहे. त्यामुळे चिनी सरकारच्या आरोग्यविषयक विभागाने जनतेला सावधानतेचा इशारा दिला आहे. मोठा मासळी बाजार असलेल्या वुहानमध्ये गेल्या महिन्यात या विषाणूचा प्रादुर्भाव झालेला एक रुग्ण आढळून आला होता. प्राण्यांकडून माणसाला या विषाणूची बाधा झाल्याचा निष्कर्ष तज्ज्ञांनी काढला आहे. याचा सर्वाधिक प्रकोप वुहान प्रांतात झाला असून, चारही मृत्यू येथेच घडले आहेत. तर, १९८ जणांच्या शरीरात हे विषाणू आढळले आहेत. त्यासोबतच बीजिंग, शांघाय आणि दक्षिण गुआंगदोंगमध्ये २०हून अधिक रुग्ण आहेत. दक्षिण कोरिया, जपान आणि थायलंडमध्ये गेलेल्या चार चिनी नागरिकांनाही याची लागण झाली आहे. 'सार्स'च्या प्रकोपानंतर चीनला मोठा आर्थिक फटका बसला होता. विशेषत: पर्यटन क्षेत्रात त्यावेळी मोठी घट नोंदली गेली होती.
इतर देशांमध्ये तपासणी
या विषाणूचा धोका ओळखून चीनमधून येणाऱ्या प्रवाशांची काही देशांमध्ये आरोग्यविषयक चाचणी होऊ लागली आहे. ऑस्ट्रेलिया, जपान आणि दक्षिण कोरियातील विमानतळांवर यासाठी दक्षता घेण्यात येत आहे. अमेरिकेतील तीन विमानतळांवरही या प्रवाशांची चाचणी होऊ लागली आहे.