Coronavirus updates चिंता वाढली...करोना विषाणूचा मेंदूवरच हल्ला; शास्त्रज्ञांनी दिला इशारा

लंडन: जवळपास सहा महिन्यांपासून करोनाच्या संसर्गाने हाहाकार माजवला आहे. काही देशांनी करोनाच्या संसर्गावर नियंत्रण मिळवले असले तरी पुन्हा करोनाबाधित आढळत असल्याचे चिंता व्यक्त केली जात आहे. करोनाला अटकाव करण्यासाठी वेगवेगळ्या पातळीवर प्रयत्न सुरू असताना आणखी एका संशोधनामुळे चिंता वाढली आहे. करोनाचा विषाणू आता थेट मेंदूवर हल्ला करत असल्याचा दावा संशोधनात करण्यात आला आहे.

युनिव्हर्सिटी कॉलेज लंडनमधील (यूएलसी) संशोधकांनी ४३ कोरोना रुग्णांच्या परिस्थितीचा आढावा घेतला. या रुग्णांना स्ट्रोक, मेंदू आणि मज्जातंतूंच्या आजारांचा सामना करावा लागत असल्याचे संशोधनातून समोर आले. त्याशिवाय करोनाच्या विषाणूमुळे मेंदूलाही गंभीर इजा होण्याचा धोका असल्याचे संशोधकांनी म्हटले आहे.

वाचा: हवेतून करोना संसर्गाचा दावा; जागतिक आरोग्य संघटना म्हणते की...

करोनामुळे निर्माण झालेला हा धोका १९२० आणि १९३० मध्ये आलेल्या महासाथीच्या आजारानंतर निर्माण झालेल्या धोक्यासारखा आहे, का यावर संशोधन सुरू असल्याचे 'यूएलसी'चे संशोधक मायकल झंडी यांनी सांगितले. करोनाचा विषाणू माणसांच्या फुफ्फुसावर हल्ला करत असल्यामुळे श्वसनाचा त्रास होत असल्याचे समोर आले होते. आता मात्र, मेंदूवरही परिणाम होत असल्याचे समोर आल्यामुळे चिंता वाढली असल्याचे संशोधकांनी म्हटले आहे.

वाचा: 'या' कारणामुळे नऊ पट वेगाने पसरतोय करोनाचा संसर्ग
'ब्रेन' या वैद्यकीय नियतकालिकेमध्ये प्रकाशित झालेल्या 'यूसीएल' अभ्यासानुसार, नऊ रुग्णांना एन्सेफॅलोमायलाईटिस (एडीईएम) नावाचे एक दुर्मिळ आजाराचे निदान झाले असल्याचे समोर आले. विषाणूजन्य संसर्गामुळे ही परिस्थिती उद्भवू शकते.

वाचा: करोना: गुड न्यूज! अमेरिकन कंपनी कमी दरात भारताला देणार रेमडेसिविर

सध्या कोविड-१९ ने बाधित असलेल्या नागरिकांची संख्या आताच एक कोटीहून अधिक झाली आहे. या वर्षाअखेर बाधितांची संख्या १० कोटी झाल्यास चिंता वाढणार असल्याची कॅनडातील वेस्टर्न युनिव्हर्सिटीतील न्यूरो तज्ञ अॅड्रियन ओवेन यांनी सांगितले. या करोनाबाधितांच्या मेंदूवर विषाणूंचा परिणाम झाल्यास त्यांच्या कार्यक्षमेतवरही परिणाम होईल. त्यामुळे दैनंदिन कामे करण्यात अडचणी निर्माण होणार असल्याची भीती त्यांनी व्यक्त केली.