वृत्तसंस्था, कोलकाता
मार्क्सवादी कम्युनिस्ट पक्षाचे (सीपीआय) ज्येष्ठ नेते आणि पश्चिम बंगालचे माजी वाणिज्य आणि औद्योगिक मंत्री निरुपम सेन यांचे सोमवारी पहाटे ५.१० मिनिटींनी दीर्घ आजाराने एका खासगी हॉस्पिटलमध्ये निधन झाले. ते ७२ वर्षांचे होते. त्यांच्या पाठीमागे पत्नी, मुलगा आणि एक मुलगी असा परिवार आहे.
सेन पक्षाच्या पॉलिट ब्युरोचे माजी सदस्य होते. डिसेंबरमध्ये प्रकृती अस्वास्थ्यामुळे त्यांना हॉस्पिटलमध्ये दाखल करण्यात आले होते. तेव्हापासून त्यांना व्हेंटिलेटरवर ठेवण्यात आले होते. सेन हे किडनीच्या विकाराने अनेक दिवसांपासून त्रस्त होते. माजी मुख्यमंत्री बुद्धदेव भट्टाचार्य यांच्या मंत्रिमंडळात ते वाणिज्य आणि औद्योगिक मंत्री होते. भट्टाचार्य यांच्या नेतृत्वाखाली सेन यांनी औद्योगिक पुनर्निर्माण आणि योजना आणि ऊर्जा मंत्रालयाचा कारभार पाहिला. ते १९८७, २००१ आणि २००६ असे तीन वेळा बंगाल विधानसभेसाठी दक्षिण बर्दवान येथून निवडून आले होते. २०११ मध्ये तृणमूल काँग्रेसचे उमेदवार रबी रंजन चट्टोपाध्याय यांनी त्यांचा पराभव केला होता. २००६ मध्ये सिंगूर येथे टाटा नॅनो कारच्या प्रकल्पासाठीच्या भूमीअधिग्रहण अभियानावरून डाव्यांच्या सरकारला मोठे नुकसान झाले. तत्कालीन विरोधी पक्ष असलेल्या तृणमूल काँग्रेसने टाटांविरोधात भूमिका घेतल्याने तसेच भूमी अधिग्रहणाविरोधात केलेल्या आंदोलनामुळे टाटांना त्यांचा प्रकल्प सिंगूरवरून गुजरात येथे हलविला. त्यानंतर २०११ मध्ये ३४ वर्षांचे डाव्यांचे सरकार उलथून टाकण्यास तृणमूल काँग्रेस पक्ष यशस्वी ठरला. या वेळी त्यांना पक्षांतर्गत आणि पक्षाबाहेरूनही सेन यांना मोठ्या टीकेला सामोरे जावे लागले होते.