'नेव्ही वॉर रूम लीक' प्रकरण
वृत्तसंस्था, नवी दिल्ली
निवृत्त कॅप्टन सलामसिंह राठोड (वय ६३) यांना दिल्ली कोर्टाने बुधवारी २००६मधील 'नेव्ही वॉर रूम लीक' प्रकरणात सात वर्षांच्या तुरुंगवासाची शिक्षा ठोठावली. राष्ट्रीय सुरक्षेविरोधात त्यांची कृती असल्याने कुठल्याही दयेस ते पात्र नाहीत, असे निरीक्षणही कोर्टाने नोंदविले.
सीबीआयचे विशेष न्यायाधीश एस. के. अगरवाल यांनी हा निर्णय दिला. 'ऑफिशिअल सिक्रेट अॅक्ट'अंतर्गत हेरगिरीप्रकरणी त्यांना शिक्षा सुनावण्यात आली. संरक्षण मंत्रालयाशी संबंधित कागदपत्रे त्यांच्याकडे आढळून आली. ही कागदपत्रे शत्रूला प्रत्यक्ष किंवा अप्रत्यक्षपणे उपयोगी ठरू शकली असती. या प्रकरणातील दुसरा आरोपी कमांडर (निवृत्त) जर्नेलसिंह कार्ला यांची निर्दोष मुक्तता करण्यात आली. राठोड यांच्याकडे त्यांना उपयुक्त न ठरणारी अनेक गोपनीय कागदपत्रे आढळून आल्याचे सरकारी वकिलांनी दाखवून दिले. केवळ समाजाविरोधात नव्हे, तर राष्ट्रीय सुरक्षेविरोधात आरोपींनी केलेला हा गुन्हा आहे, असे त्यांनी कोर्टाच्या निदर्शनास आणले. न्यायाधीश म्हणाले, 'दोषी कमी शिक्षेस अजिबात पात्र नाहीत. देशाच्या सुरक्षेच्या संदर्भात एक सैनिक या नात्याने त्यांची प्राथमिक जबाबदारी देशासाठी आपले आयुष्यही प्रसंगी पणास लावण्याची आहे, त्यांनी मात्र विरुद्ध कृती केली आहे. इतर कुणी असा गुन्हा करण्यास धजावणार नाही, याकरिता ही शिक्षा सुनावली जात आहे.'
वॉर रूम लीकेज प्रकरणात सुमारे सात हजारांहून अधिक पानांची सुरक्षेच्या संदर्भातील संवेदनशील माहिती होती. राष्ट्रीय सुरक्षेशी ती थेट संबंधित होती. राठोड यांनी संरक्षण दलातील आपल्या कामगिरीचा आढावा घेऊन शिक्षा कमी मिळविण्याकरिता अर्ज केला होता. तीन वर्षे ते तुरुंगातच असून तेरा वर्षे सुनावणी सुरू असल्याची बाब त्यांच्या वकिलाने सांगितली. संरक्षण दलामध्ये २८ वर्षांहून अधिक काळ त्यांनी सेवा केली तसेच या काळात नौदल आणि केंद्र सरकारने आपल्या कामाची प्रशंसा केल्याचेही त्यांच्या वकिलाने सांगितले. मात्र, मुख्य प्रकरणात फौजदारी स्वरूपाचे कट कारस्थान रचण्याचा आरोप असलेले लेफ्टनंट कुलभूषण पराशर, माजी कमांडर विजेंदर राणा, निलंबित नौदलाचे कमांडर व्ही. के. झा, माजी आयएएफ विंग कमांडर सांभा जी एल सुर्वे आणि दिल्लीस्थित शस्त्रांचा व्यापार करणारा अभिषेक वर्मा हे आरोपी जामिनावर आहेत.