गोरे मूल दत्तक देण्यास नकार

मटा ऑनलाइन वृत्त । लंडन

भारतीय वंशाच्या दाम्पत्याला गोरे मूल दत्तक देण्यास नकार मिळाल्याचा प्रकार ब्रिटनमध्ये घडला आहे. केवळ गोरी मुलंच दत्तक देण्यासाठी उपलब्ध असल्यामुळे दातृत्वासाठीचा आपला अर्ज स्वीकारला जाऊ शकत नाही, असे या शीख दाम्पत्याला संबंधित संस्थेने सांगितले आहे.

संदीप आणि रीना मंडेर यांच्या बाबतीत हा प्रकार घडला आहे. संदीप हे एका खासगी कंपनीत सेल्स विभागाचे उपाध्यक्ष असून लग्नाला सात वर्षे होऊनही मूल होत नसल्याने मूल दत्तक घेण्याचा निर्णय या दाम्पत्याने घेतला आहे. त्यानुसार अॅडॉप्ट बर्कशायर या संस्थेकडे अर्ज त्यांनी केला. आम्हाला कोणत्याही वंशाचं मूल चालेल, असे या दाम्पत्याने अर्जात नमूद केले होते. मात्र या दाम्पत्याचा अर्ज स्वीकारण्यास संबंधित संस्थेने नकार दिला. आमच्याकडे गोरी मूलंच उपलब्ध आहेत आणि ती दत्तक देताना गोऱ्या ब्रिटीश आणि युरोपिय दाम्पत्यांनाच प्राधान्य दिलं जाईल, असे या संस्थेने सांगितले.

दरम्यान, मंडेर दाम्पत्य हे प्रकरण कोर्टात घेऊन जाण्याच्या तयारीत आहे. ब्रिटनच्या पंतप्रधान तेरेसा मे या येथील स्थानिक खासदार असून त्यांच्याकडेही या दाम्पत्याने दाद मागितली आहे.