पाकिस्तानः 'इसिस'च्या ६ दहशतवाद्यांचा खात्मा

इस्लामाबादः पाकिस्तानच्या सुरक्षा दलाने आज अचानक बलुचिस्तानमध्ये धाड टाकली. या ठिकाणी लपलेल्या सहा दहशतवाद्यांचा खात्मा करण्यात सुरक्षा दलाला यश आले. मारले गेलेले सर्वच्या सर्व सहा दहशतवादी हे दहशतवादी संघटना 'इसिस'चे होते, अशी माहिती पाकिस्तानच्या पोलिसांनी दिली. मारल्या गेलेल्या दहशतवाद्यांमध्ये एका महिलेचाही समावेश आहे.

पाकिस्तानी मीडियाने दिलेल्या माहितीनुसार, बलुचिस्तानची राजधानी क्वेटातील ईस्टर्न बायपास जवळ सुरक्षा दलाने छापा टाकला. या ठिकाणी लपून बसलेल्या दहशतवाद्यांनी सुरक्षा दलाच्या दिशेने गोळीबार केला. त्याला प्रत्युत्तर म्हणून पाकिस्तानच्या सुरक्षा दलाने गोळीबार केला. या गोळीबारात सहा दहशतवादी मारले गेले. यात एका महिलेचाही समावेश होता. तसेच यात एका पोलीस अधिकाऱ्याचाही मृत्यू झाला आहे, अशी माहिती पोलीस महासंचालक मोहसिन हसन बट यांनी दिली.

मारले गेलेले सहा दहशतवादी हे आयएसआयएसचे होते. या गोळीबारात पाकिस्तानचे दहशतवाद विरोधी पथकातील ८ जवान जखमी झाले असून यातील एकाची प्रकृती चिंताजनक आहे, अशी माहिती बट यांनी दिली. सहा तासांपर्यंत चाललेल्या या ऑपरेशनमध्ये पाकिस्तानचे दहशतवाद विरोधी पथक, एटीएफच्या पथकांचा सहभाग होता, असेही बट म्हणाले.