‘इस्लामी’ बंदीला सशर्त मान्यता

वॉशिंग्टन: अमेरिकेचे अध्यक्ष डोनाल्ड ट्रम्प यांनी सहा इस्लामी देशांतील नागरिकांना अमेरिकेत घातलेली प्रवेशबंदी सर्वोच्च न्यायालयाने अंशतः मान्य केली. या प्रकरणी तपशीलवार सुनावणी ऑक्टोबरमध्ये होणार आहे.

ट्रम्प यांनी जानेवारीत पदभार स्वीकारल्यानंतर मार्चमध्ये इराण, लीबिया, सोमालिया, सुदान, सीरिया आणि येमेनच्या नागरिकांना ९० दिवसांसाठी प्रवशबंदी केली होती; तसेच निर्वासितांनाही १२० दिवसांसाठी प्रवेश बंदी केली होती. मात्र, न्यायालयाने या निर्णयाला स्थगिती दिली होती. अमेरिकेतील सर्वोच्च न्यायालयाने ट्रम्प यांना दिलासा देताना सोमवारी असा निकाल दिला, की या देशांतील नागरिकांचे अमेरिकी नागरिकांशी जवळचे नातेसंबंध असल्याखेरीज त्यांना अमेरिकेत प्रवेश देऊ नये. अध्यक्षांनी आपल्या अधिकारांची मर्यादा ओलांडल्याची टीका त्या वेळी करण्यात आली होती. मात्र, अमेरिकेशी संबंधित नसलेल्या परदेशी नागरिकांवर सरकार निर्बंध घालू शकते, असे सोमवारी दिलेल्या निकालात सर्वोच्च न्यायालयाने म्हटले आहे.