वृत्तसंस्था, ब्रुसेल्स
परराष्ट्रमंत्री सुषमा स्वराज यांनी शनिवारी बेल्जियमचे उपपंतप्रधान आणि परराष्ट्रमंत्री डिडियर रेंडर्स यांच्यासोबत चर्चा केली. दोन्ही नेत्यांनी द्विपक्षीय संबंध, तसेच प्रादेशिक आणि बहुस्तरीय मुद्द्यांवर भूमिकांचा आढावा घेतला.
चार देशांच्या दौऱ्यावर असलेल्या सुषमा स्वराज लक्झम्बर्गहून बुधवारी बेल्जियममध्ये दाखल झाल्या. त्यांच्या दौऱ्याचा हा शेवटचा टप्पा आहे. यापूर्वी त्यांनी फ्रान्स आणि इटलीला भेट दिली. 'भारत आणि बेल्जियमचे द्विपक्षीय संबंध ७० वर्षांपासून आहेत. परराष्ट्रमंत्री सुषमा स्वराज यांचे बेल्जियमचे परराष्ट्रमंत्री डिडियर रेंडर्स यांनी इगमाँट पॅलेस येथे स्वागत केले,' असे परराष्ट्र मंत्रालयाचे प्रवक्ते रवीश कुमार यांनी शुक्रवारी ट्विटरवरून सांगितले.
'परराष्ट्रमंत्री स्वराज आणि रेंडर्स यांच्या नेतृत्वाखालील शिष्टमंडळामध्ये चर्चा झाली. दोन्ही नेत्यांनी द्विपक्षीय संबंध आणि विविध प्रादेशिक आणि बहुस्तरीय मुद्द्यांचा सर्वसमावेश आढावा घेतला,' असे रवीशकुमार यांनी दुसऱ्या ट्विटमध्ये म्हटले आहे.
स्वराज यांनी युरोपियन युनियनच्या उच्च प्रतिनिधी फेडरिका मोघेरिनी यांचीही भेट घेऊन दहशतवादविरोधी लढा, सागरी सुरक्षा, व्यापार आणि गुंतवणुकीसह विविध विषयांवर चर्चा केली. बेल्जियममधील दौऱ्यावेळी स्वराज यांनी युरोपियन युनियनच्या नेत्यांशी द्विपक्षीय संबंध मजबूत करण्यासाठी व्यापक स्वरूपात चर्चा केली. २००४ पासून भारत आणि युरोपियन युनियन धोरणात्मक भागीदार आहेत. २८ देशांच्या या गटासोबतच्या व्यापारातील भारत मोठा व्यापारी भागीदार आहे. युरोपियन युनियनसोबत भारताचा व्यापार २०१६मध्ये ८८ अब्ज डॉलर इतका होता. २००० ते २०१७ या काळात भारताला युरोपातून सुमारे ८३ अब्ज डॉलरची थेट परकीय गुंतवणूक (एफडीआय) मिळाली आहे. या काळातील देशाच्या एकूण 'एफडीआय'पैकी ही गुंतवणूक २४ टक्के इतकी आहे.
....