दहशतवादी गटांसोबतच्या संबंधावर तालिबानचे भाष्य; म्हणाले...

काबूल: अफगाणिस्तानमधून अमेरिकन सैन्याने माघार घेतल्यानंतर तालिबानने आक्रमक भूमिका घेत अनेक ठिकाणचा ताबा घेण्यास सुरुवात केली आहे. तालिबानने अफगाणिस्तानचा ताबा घेतल्यास दहशतवादी गटांना आश्रय मिळणार असल्याची भीती व्यक्त केली जात असताना तालिबानने मोठे वक्तव्य केले आहे. लष्कर-ए-तोयबा आणि जैश-ए-मोहम्मद या दहशतवादी संघटनांशी आमचा संबंध नसल्याचे तालिबान प्रवक्ते सुहैल शाहीन यांनी स्पष्ट केले. त्याशिवाय अफगाणिस्तानच्या भूमीचा वापर इतर देशांमध्ये दहशतवाद फैलावण्यास करू देणार नसल्याचेही त्यांनी सांगितले.

एका दिलेल्या मुलाखतीत तालिबान प्रवक्ते सुहैल शाहीन यांनी म्हटले की, तालिबानचा पाकिस्तानमधील संघटनांशी संबंध नाही. पाकिस्तानमधील दहशतवादी संघटना आणि गु्प्तचर अधिकारी तालिबानसोबत अफगाण जवानांविरोधात लढत असल्याचे वृत्त काही दिवसांपूर्वी प्रकाशित झाले होते. तालिबानच्या सदस्यांना पाकिस्तानमधील हैदराबाद येथे प्रशिक्षण दिले जात असल्याचाही दावा काही वृत्तांमध्ये करण्यात आला होता.

वाचा: पाकिस्तानमध्ये अफगाणिस्तान राजदूताच्या मुलीचे अपहरण; तालिबानवर संशय

वाचा: स्पिन बोल्डाक भागावर अफगाण सैन्याचा ताबा; याच भागात झाली होती भारतीय पत्रकाराची हत्या

भारताकडून तालिबानला अपेक्षा

शाहीन यांनी भारतीय प्रतिनिधींसोबत बैठक झाल्याचे वृत्तही फेटाळून लावले. त्यांनी म्हटले की, भारत अफगाणिस्तानच्या मुद्यावर निष्पक्ष राहिल अशी अपेक्षाही त्यांनी व्यक्त केली. अफगाणिस्तानमध्ये महिलांचे अधिकार सुरक्षित राहतील असा दावा त्यांनी केला. इस्लामच्या नियमांनुसार महिलांना शिक्षण आणि काम करण्याचे स्वातंत्र्य दिले जाईल असे शाहीन यांनी म्हटले.

वाचा: 'या' देशासाठी अमेरिका करणार नव्या 'क्वाड'ची स्थापना; पाकिस्तानचाही समावेश

दरम्यान, याआधी एका मुलाखतीत तालिबानच्या प्रकवत्यांनी भारताच्या भूमिकेवर प्रश्न उपस्थित केले होते. परदेशी शक्तिंनी अफगाणिस्तानमध्ये स्थापन केलेल्या सरकारला भारत साथ देत असेल तर आम्ही त्यांच्यासोबत नाही. भारताचा एक चुकीचा निर्णय त्यांच्यासाठी चिंतेचे कारण ठरू शकतो असा इशाराही तालिबानने दिला होता. भारत तालिबानविरोधी गटाला शस्त्रे देत असल्याचे आम्हाला समजले आहे. एका बाजूला तालिबानसोबत चर्चा करायची आणि दुसऱ्या बाजूला विरोध गटाला शस्त्रे, ड्रोन कसे काय देऊ शकतो, असेही शाहीन यांनी म्हटले होते.