स्वातंत्र्यदिनी तालिबानी हल्ल्याची शक्यता

मटा ऑनलाइन वृत्त । लाहोर

स्वातंत्र्यदिनाच्या पार्श्वभूमीवर पाकिस्तानला लागून असलेल्या भारताच्या वाघा व गांदा सिंह सीमेवर तालिबानी दहशतवाद्यांकडून आत्मघाती हल्ला होऊ शकतो, असा अॅलर्ट पाकिस्तानी गुप्तचर यंत्रणेनं जारी केला आहे.

येत्या १५ ऑगस्ट रोजी भारत आपला ७०वा स्वातंत्र्यदिन साजरा करत आहे. तर, पाकिस्तानचा स्वातंत्र्यदिन येत्या रविवारी, म्हणजेच १४ ऑगस्ट रोजी साजरा होणार आहे. स्वातंत्र्यदिनाचं औचित्य साधून दोन्ही देशांचे सैनिक संयुक्त संचलन करतात. या संचलानावर आत्मघाती हल्ला करण्याचा कट तेहरिक-ए-तालिबान (फजलुल्लाह) गटानं आखला आहे. त्यासाठी दोन आत्मघाती हल्लेखोर पाठवण्यात आले आहेत,' अशी माहिती पाकिस्तानी गुप्तचरांना मिळाली आहे.

पाकच्या राष्ट्रीय दहशतवादविरोधी यंत्रणेनं याबाबत पाकिस्तानाच्या पंजाब प्रांताचे गृहखाते, पाकिस्तानी रेंजर्सचे महासंचालक व पंजाब पोलीस प्रमुखांना सूचना दिल्या आहेत. १३, १४ व १५ ऑगस्ट रोजी सीमेवर कडेकोट सुरक्षा व्यवस्था ठेवण्याचे निर्देशही दिले आहेत. गुप्तचरांच्या अॅलर्टनंतर लाहोर पोलिसांनी केलेल्या कारवाईत ५० संशयितांना ताब्यात घेण्यात आलं असून त्यांची कसून चौकशी सुरू आहे.