श्रीनगर : जम्मू-काश्मीरमध्ये सुरू असलेल्या पावसाच्या पार्श्वभूमीवर प्रशासनाने दक्षिण काश्मीरमध्ये पुराचा इशारा दिला आहे. नागरिकांनी स्थलांतरासाठी तयार राहावे, अशा सूचना प्रशासनाने दिल्या आहेत.
मध्य काश्मीरमधील सखल भागात पुराचा इशारा देण्यात आला आहे. खराब हवामानामुळे शनिवारी श्रीनगरमधील शाळा बंद ठेवण्यात आल्या होत्या. 'राम मुन्शी बाग येथील मापकावर १८ फुटांची पूररेषा ओलांडली गेली आहे. सकाळी दहा वाजता येथून नदी २०.८७ फुटांच्या पातळीवर वाहत होती,' असे सिंचन आणि पूर नियंत्रण विभागाच्या अधिकाऱ्यांनी सांगितले. झेलम नदी किनारी राहणाऱ्या नागरिकांना, तसेच मध्य काश्मीरमधील सखल भागातील इतर नद्यांच्या किनारी राहत असलेल्या नागरिकांना सजग राहण्यास सांगण्यात आले आहे.
दक्षिण काश्मीरमधील अनंतनाग जिल्ह्यातील संगम येथे नदीच्या पातळीने २१ फुटांचा टप्पा ओलांडला. त्यानंतर पुराचा इशारा देण्यात आला आहे. संगम येथे सकाळी दहा वाजता पाणीपातळी २३.०६ फूट इतकी होती. काश्मीर खोऱ्यात गेल्या तीन दिवसांपासून पाऊस पडत आहे. श्रीनगरमध्येही शुक्रवारी पाऊस झाला. नद्याच्या पाणीपातळीत वाढ होत असल्याने नागरिकांमध्ये चिंतेचे वातावरण आहे. २०१४मध्ये आलेल्या पुरामुळे काश्मीरमध्ये मोठी हानी झाली होती. या पुरात ३०० जणांचा बळी गेला होता.