मानवी क्षमतेला आव्हान

३१०० मैल शर्यतीत रशियाचे व्हेसू डझ्ली प्रथम

वृत्तसंस्था, न्यूयॉर्क

येथील आध्यात्मिक गुरू श्री चिन्मॉय यांनी सुरू केलेल्या तब्बल एकतीसशे मैलांच्या धावण्याच्या शर्यतीत यंदा नवीन विक्रम प्रस्थापित झाले. न्यू यॉर्कमध्ये या शर्यतीची सांगता झाली. रशियाचे व्हेसू डझ्ली यांनी ४७ दिवसांत हे अंतर पार करत प्रथम क्रमांक पटकावला. या स्पर्धेचे हे एकविसावे वर्ष होते.

२००७मध्ये निधन पावलेल्या श्री चिन्मॉय यांनी आपल्या हयातील अनेक आव्हाने पार केली होती. मनुष्याने आपल्या मर्यादा शोधाव्यात व कठोर परिश्रमाने या मर्यादांवर मात करीत नवीन आव्हाने पार करावीत, अशी शिकवण देणाऱ्या श्री चिन्मॉय यांनी ही खडतर शर्यत सुरू केली होती.

यंदा ही शर्यत तब्बल ५२ दिवस चालली. या शर्यतीत रशियाचे व्हेसू डझ्ली अजिंक्य ठरले. त्यांनी एकतीसशे मैलांचे हे खडतर अंतर ४७ दिवसांत पूर्ण केले. तर, कानिनिका जानाकोव्हा ही स्लोव्हाकियाची महिला उपविजेती ठरली. या महिलेने हे अंतर ४९व्या दिवशी पार केले.

अष्टपैलू व्यक्तिमत्त्व

मानवी क्षमतेला आव्हान देणारे श्री चिन्मॉय यांचे व्यक्तिमत्त्व अष्टपैलू होते. चिन्मॉय यांनी तब्बल २१ हजार गीते रचली होती. तर, या गीतांचे सातशे कार्यक्रम सादर केले होते. याशिवाय त्यांनी सोळाशे पुस्तकेही लिहिली होती. चिन्मॉय हे मॅरेथॉन धावपटू, टेनिस खेळाडू तसेच भारोत्तोलकही होते.