वृत्तसंस्था, यंगून
संयुक्त राष्ट्रांना म्यानमारच्या अंतर्गत कारभारात हस्तक्षेप करण्याचा अधिकार नाही, अशी भू्मिका मांडून म्यानमारचे लष्करप्रमुख मीन आँग हलैंग यांनी रोहिंग्यांच्या हत्याकांडप्रकरणी चौकशी फेटाळली आहे.
रोहिंग्यांचे हत्याकांड हा नरसंहार असल्याचे स्पष्ट करून संयुक्त राष्ट्रांच्या चौकशी समितीने म्यानमारच्या वरिष्ठ लष्करी अधिकाऱ्यांविरुद्ध आंतरराष्ट्रीय गुन्हेगारी न्याालयात खटला चालविण्याचे आवाहन सुरक्षा समितीला केले होते. तसेच म्यानमारच्या राजकारणातून लष्कराने बाजूला होण्याची सूचनाही केली होती. न्यूयॉर्क येथे संयुक्त राष्ट्रांच्या आमसभेत यावर चर्चा होण्याची शक्यता व्यक्त केली जात आहे. या पार्श्वभूमीवर हलैंग यांनी सोमवारी भूमिका स्पष्ट केली. ते म्हणाले, 'कोणताही देश, संघटना किंवा गटाला देशात हस्तक्षेप करण्याचा आणि सार्वभौमत्वाबाबत निर्णय घेण्याचा अधिकार नाही.'