इंग्लंडमध्ये नागरिक कामावर; वेल्स, स्कॉटलंडचा विरोध
वृत्तसंस्था, लंडन
ब्रिटनचे पंतप्रधान बोरिस जॉन्सन यांनी लॉकडाउनमधून बाहेर येण्यासाठी नियोजन जाहीर केल्यानंतर इंग्लंडमधील निर्बंध बुधवारपासून शिथिल करण्यात येत आहेत. येथील नागरिकांना कामावर जाण्यासाठी सार्वजनिक वाहतूक टाळण्याचा सल्ला देण्यात आला आहे. दरम्यान, निर्बंध शिथिल करण्याच्या ब्रिटन सरकारच्या निर्णयाविषयी वेल्स आणि स्कॉटलंडच्या प्रशासनाने वेगळीच भूमिका घेतली आहे.
जॉन्सन यांनी गेल्या आठवड्यामध्ये कालबद्ध कार्यक्रम जाहीर केला होता. त्यामुळे नागरिकांना घराबाहेर पडता येणार आहे. तसेच, गोल्फसारख्या खेळांनाही परवानगी देण्यात आली आहे. घराबाहेर पडताना चेहरा झाकण्याचा सल्ला देण्यात आला आहे. दरम्यान, ब्रिटिश सरकारने केलेल्या या नियमांशी वेल्स, स्कॉटलंड आणि उत्तर आयर्लंड प्रशासनांचे मतभेद आहेत. स्कॉटलंडचे प्रथम मंत्री निकोला स्टर्जिओन यांनी नागरिक घराबाहेर पडत आहेत, त्याविषयी चिंता व्यक्त केली आहे. ब्रिटिश सरकारची मार्गदर्शक तत्त्वे सध्या स्कॉटलंडमध्ये लागू करण्यात आलेली नाहीत, असे त्यांनी नमूद केले. तर, वेल्सचे प्रथम मंत्री मार्क ड्रेकफोर्ड यांनीही अशीच भूमिका घेतली आहे. इंग्लंडच्या सीमेवर पोलिस गस्त घातली आणि सुट्ट्या साजऱ्या करण्यासाठी येणाऱ्या नागरिकांना परत पाठविण्याच्या सूचना त्यांना करण्यात आल्या आहेत, असे ड्रेकफोर्ड यांनी सांगितले.
चीनमध्ये करोनाचे १५ नवे रुग्ण
बीजिंग : चीनमध्ये करोनाचे नवे १५ रुग्ण सापडले असून, त्यातील आठ जणांना कोणतीही लक्षणे दिसून येत नाही. दरम्यान, करोनाच्या डिसेंबर-जानेवारीतील प्रादुर्भावाचा केंद्रबिंदू असणाऱ्या वुहान शहरात नवा रुग्ण सापडलेला नाही. वुहानमध्ये पुन्हा रुग्ण सापडू लागल्यामुळे, शहरातील १.१ कोटी नागरिकांची चाचणी घेण्याची घोषणा चीन सरकारने केली आहे. वुहानमध्ये नव्याने सापडलेल्या ५९८ रुग्णांमध्ये कोणतीही लक्षणे आढळलेली नाहीत आणि हीच चिंतेची बाब मानण्यात येत आहे. यातून करोनाचे नवे क्लस्टर तयार होण्याची भीती व्यक्त करण्यात येत आहे. त्यामुळे शहरातील सर्व नागरिकांची चाचणी करण्यासाठी दहा दिवसांचे वेळापत्रक तयार करण्यात आले आहे. वुहानसह हुबेई प्रांतामध्ये डिसेंबरपासून झालेल्या करोनाच्या फैलावामध्ये चार हजार ५१२ जणांचा मृत्यू झाला असून, त्यातील तीन हजार ८६९ जण वुहान शहरातीलच आहेत. हुबेई प्रांतात ६८ हजार १३४ रुग्णांची नोंद झाली होती, त्यात वुहानमधील ५० हजार ३३९ जणांचा समावेश होता.
न्यूझीलंडमध्ये नवा रुग्ण नाही
वेलिंग्टन : न्यूझीलंडमध्ये सलग दुसऱ्या दिवशी करोनाचा रुग्ण आढळला नाही. त्यामुळे, देशातील लॉकडाउन मध्यरात्रीपासून शिथिल करण्यासाठी निर्णय घेण्यात येत आहे, असे आरोग्य खात्याचे महासंचालक एश्ले ब्लूमफिल्ड यांनी सांगितले. त्यानंतर मॉलसह दुकाने आणि रेस्टॉरंटवरील निर्बंध दूर होतील.