वृत्तसंस्था, वॉशिंग्टन
अमेरिकेच्या प्रतिनिधीगृहामध्ये बहुमत येताच, पहिल्याच दिवशी डेमोक्रॅटिक पक्षाने मेक्सिको सीमेवर भिंत बांधण्याच्या अध्यक्ष डोनाल्ड ट्रम्प यांच्या मनसुब्यांना सुरूंग लावला आहे. सर्व सदस्यांवरील दबाव वाढविताना, सरकारी यंत्रणेचाच निधी ट्रम्प यांनी रोखून धरला आहे. मात्र, या भिंतीशिवाय अन्य खर्चासाठीच्या आराखड्याला मंजुरी देण्याचा प्रस्ताव प्रतिनिधीगृहामध्ये गुरुवारी रात्री मंजूर करण्यात आला.
ट्रम्प यांना मेक्सिको सीमेवर भिंत उभारत, अवैध स्थलांतरितांना रोखायचे आहे. त्यासाठीचा निधी मंजूर केल्याशिवाय, सरकारी खर्चाच्या विधेयकाला मंजुरी द्यायची नाही, यावर ट्रम्प ठाम आहेत. त्यामुळेच, १३ दिवसांपासून अमेरिकेतील सरकारी कार्यालयांचे कामकाज ठप्प झाले आहे. अमेरिकेत काही महिन्यांपूर्वी झालेल्या निवडणुकीमध्ये प्रतिनिधीगृहामध्ये विरोधी डेमोक्रॅटिक पक्षाचे बहुमत आले आहे, त्यानुसार नवे सभागृह गुरुवारी अस्तित्वात आले. सभागृहाची सुरुवात होताच, सभागृहाच्या सभापतिपदी डेमोक्रॅटिक पक्षाच्या नॅन्सी पेलोसी यांची निवड करण्यात आली. प्रतिनिधीगृहाच्या सभापती नॅन्सी पेलोसी म्हणाल्या, 'खरंच आपण भिंत बांधत नाही. आपण भिंत बांधत नाही, याविषयी कोणाला शंका आहे का? ट्रम्प यांचा हा प्रस्ताव म्हणजे वास्तव आणि त्यांचे सहकारी यांच्यातील भिंत आहे. ही भिंत अनैतिकतेची असून, ती आपल्या राष्ट्राच्या मूल्यांशी सुसंगत नाही.'
दरम्यान, व्हाइट हाऊसच्या पत्रकार कक्षामध्ये ट्रम्प काही काळासाठी उपस्थित होते. 'मेक्सिको सीमेवरील भिंतीशिवाय आपल्याला सुरक्षितता मिळणार नाही,' असे मत त्यांनी मांडले आणि त्यानंतर कोणत्याही प्रश्नाशिवाय ते निघून गेले.
भारतीय पोलिसाच्या पत्नीचे सांत्वन
अवैध स्थलांतरितांनी केलेल्या गोळीबारात मृत्युमुखी पडलेल्या भारतीय वंशाचे अमेरिकन पोलिस रॉनिल रॉन सिंह यांच्या पत्नीचे अमेरिकेचे अध्यक्ष डोनाल्ड ट्रम्प यांनी सांत्वन केले. ही घटना २६ डिसेंबर रोजी कॅलिफोर्निया सीमेवर घडली होती. त्यांनी सेवेमध्ये बजावलेल्या कामगिरीचे स्मरण करतानाच, या प्रकरणाचा तातडीने तपास करण्याचे आश्वासन ट्रम्प यांनी दिले.