पाकला दिलेला पैसा अमेरिका वसूल करणार

मटा ऑनलाइन वृत्त । वॉशिंग्टन

पाकिस्तानला केलेली आर्थिक मदत अमेरिका कर्ज म्हणून वसूल करणार आहे. अमेरिकेने पाकिस्तानला लष्करी सामग्री खरेदीसाठी देण्यात येणारे आर्थिक अनुदान आता कर्ज असणार आहे.

अमेरिकेचे राष्ट्राध्यक्ष डोनाल्ड ट्रम्प यांनी आपल्या वार्षिक अर्थसंकल्पात याबाबतचा प्रस्ताव ठेवला आहे. याबाबतचा अंतिम निर्णय घेण्याचा अधिकार परराष्ट्र मंत्रालयाला देण्यात आला आहे.

ट्रम्प प्रशासनाचा पहिला अर्थसंकल्प अमेरिकन काँग्रेसमध्ये सादर करण्यात येणार आहे. अर्थसंकल्प व्यवस्थापन कार्यालयाचे संचालक मिक मुल्वेनी यांनी व्हाईट हाऊसमध्ये सांगितले की, ट्रम्प प्रशासन पाकिस्तानसह अन्य देशांना लष्करी सामग्री खरेदीसाठी देत असलेल्या अनुदानाला कर्जाच्या रक्कमेत बदलण्याचा प्रस्ताव दिला आहे. प्रशासनातंर्गत झालेल्या चर्चेदरम्यान हा पर्याय समोर आला आहे. मात्र, हा अंतिम निर्णयही नसल्याचे मुल्वेनी यांनी स्पष्ट केले. इस्त्राएल आणि इजिप्त देशांना मिळणारी मदत ही अनुदान म्हणून कायम असणार आहे. ट्रम्प प्रशासनाने उचलेले हे पाऊल अमेरिकेच्या वाढत्या लष्करी खर्चावर नियंत्रण आणण्यासाठी उचलण्यात आल्याचे समजते.