प्रवेशबंदीसाठी आता नवा कार्यकारी आदेश

वॉशिंग्टनः सात देशांतील नागरिकांना अमेरिकेत केलेल्या प्रवेशबंदीला कोर्टाने स्थगिती दिल्यानंतर, आता या प्रवेशबंदीसाठी नवा कार्यकारी आदेश काढण्याचे अमेरिकेचे अध्यक्ष डोनाल्ड ट्रम्प यांनी जाहीर केले आहे. पुढील आठवड्यात हा आदेश काढला जाईल, असेही ट्रम्प यांनी स्पष्ट केले आहे. ‘कोर्टाच्या आदेशाचे उल्लंघन होणार नाही, अशा पद्धतीने नवा कार्यकारी आदेश काढला जाईल,’ असे ट्रम्प यांनी म्हटले आहे. या आदेशाला टेक्सास प्रांताने पाठिंबा दर्शवला आहे.

इराण, सुदान, लीबिया, सोमालिया, सीरिया, इराक आणि येमेन येथील विस्थापितांना अमेरिकेत ९० दिवसांसाठी प्रवेशबंदी, सर्व शरणार्थींना १२० दिवसांची आणि सीरियातील शरणार्थींना कायमची प्रवेशबंदी करणारा आदेश ट्रम्प यांनी काढला होता. त्याला अमेरिकेतील एका कोर्टाने स्थगिती दिली. त्याला ट्रम्प प्रशासनाने नवव्या सर्किट कोर्ट ऑफ अपील्समध्ये आव्हान दिले होते. मात्र, या कोर्टाने प्रवेशबंदीवरील स्थगिती उठविण्यास नकार दिला.