काश्मीरच्या मुद्यावर तुर्कीचा ना'पाक' सूर

इस्लामाबाद: पाकिस्तानच्या दौऱ्यावर असलेल्या तुर्कीचे राष्ट्रपती रिसेप तैयप एर्दोगान यांनी काश्मीरप्रश्नी पाकिस्तानची बाजू घेतली आहे. पाकिस्तानच्या संसदेच्या संयुक्त अधिवेशनाला संबोधित करताना त्यांनी काश्मीरमधील जनतेला प्रचंड यातना सहन कराव्या लागत असल्याचे सांगत काश्मीरचा मुद्दा हा तुर्कीचाही असल्याचे म्हटले.

एर्दोगान यांनी आपल्या भाषणात पाकिस्तानला विनाअट पाठिंबा देण्याचे वचन दिले. एर्दोगान यांनी म्हटले की, तुर्कीतील कॅनाकलेमध्ये जे १०० वर्षांपूर्वी झाले त्याचीच पुनरावृत्ती काश्मीरमध्ये होत आहे. तुर्की या दडपशाहीविरोधात आवाज उठवत राहणार असल्याचे त्यांनी सांगितले. पाकिस्तान आणि तुर्की यांच्यातील संबंध हितावर आधारीत नसून प्रेमावर आधारीत आहे. आज काश्मीरचा मुद्या पाकिस्तानच्या जितक्या जवळ आहे. तितकाच तो मुद्या आमच्याही जवळ असल्याचे त्यांनी स्पष्ट केले. पूर्वीप्रमाणेच तुर्की काश्मीरच्या मुद्यावर पाकिस्तानला पाठिंबा देणार असल्याचे एर्दोगान यांनी पाकिस्तानच्या संसदेत स्पष्ट केले.

वाचा: पुलवामाच्या वर्षपूर्तीला पाकचा गोळीबार; एक ठार
वाचा: मुंबई हल्ल्याचा मास्टरमाइंड हाफिजला ११ वर्षे कारावास
वाचा: जिन्नांचा द्विराष्ट्राचा सिद्धांत मूर्खपणा; पाक शास्त्रज्ञाची टीका

आपल्या भाषणात तुर्कीच्या राष्ट्रपतींनी अमेरिकेचे राष्ट्राध्यक्ष डोनाल्ड ट्रम्प यांच्यावरही टीका केली. मध्य-पूर्व आशियामध्ये अमेरिका शांतता नियोजनाच्या (पीस प्लान) गोष्टी करते. मात्र, हे आक्रमणकारी धोरण आहे. कोणत्याही देशात मुस्लिम मारले जात असतील तर मुस्लिम देशांना एकत्र यायला हवे असेही त्यांनी म्हटले.