तुर्कीत रशियाच्या राजदुताची हत्या

मटा ऑनलाइन वृत्त । अंकारा

तुर्कीची राजधानी अंकारा सोमवारी रशियाच्या राजदुतांच्या हत्येने हादरली. हल्ल्याचा हा थरार कॅमेऱ्यात टिपला गेला. एका छायाचित्र प्रदर्शनाच्या कार्यक्रमात तुर्की पोलिसाने गोळी घालून ही हत्या केली. हत्येनंतर हल्लेखोर 'अलेप्पोचा बदला' अशी घोषणाबाजी केली. भारतीय प्रमाण वेळेनुसार सोमवारी रात्री साडे दहाच्या सुमारास ही घटना घडली.

हल्लेखोर छायाचित्र प्रदर्शनाच्या ठिकाणी घुसला. त्याने पहिली गोळी हवेत झाडली. यानंतर रशियाचे राजदूत आंद्रे कार्लोव्ह यांना दुसरी गोळी घातली. अतिशय जळून हा हल्ला झाल्याने कार्लोव्ह यांचा या हल्ल्यात जागीच मृत्यू झाला. हल्लेखोराची ओळख पटली आहे. मेवल्यूट मर्ट ऐल्टिंटश असं त्याचं नाव आहे. ऐल्टिंटश हा पोलिसांच्या विशेष दलात कार्यरत होता. हल्ल्यानंतर पोलिसांनी केलेल्या कारवाईत ऐल्टिंटश ठार झाला.

İşte Rus Büyükelçi Karlov'un vurulma anı! pic.twitter.com/UICaNMDVOC — TrabzonAjans.com (@TrabzonAjanscom) December 19, 2016
छायाचित्र प्रदर्शनात रशियाचे राजदूत आंद्रे कार्लोव्ह भाषण देत होते. तेव्हा तिथे हल्लेखोर ऐल्टिंटश आला आणि त्याने घोषणाबाजी सुरू केली. 'अलेप्पो विसरू नका. आम्ही अलेप्पोमध्ये मरतोय, तुम्ही इथे मरा'. आणि यानंतर 'अल्लाहू अकबर' म्हणत त्याने आंद्रे कार्लोव्ह यांच्यावर गोळी झाडली. गोळी लागताच कार्लोव्ह जमिनीवर कोसळले. या घटनेत आणखी इतर तिघे जण जखमी झाले. गोळी मारल्यानंतरही ऐल्टिंटश घोषणा देत होता.

रशियाच्या परराष्ट्र मंत्रालयाने हा दहशतवादी हल्ला असल्याचं म्हटलं आहे. तसंच रशियाचे अध्यक्ष ब्लादिमीर पुतीन यांनी घटन गंभीरतेने घेत परराष्ट्र मंत्रालय आणि गुप्तचर संस्थांची बैठक बोलावली आहे.

सिरीयातील संघर्षामुळे रशिया आणि तुर्कीचे संबंध ताणले गेले आहेत. सिरीयातील संघर्षात दोन्ही देशांचा वेगवेगळ्या गटांना पाठिंबा दिला आहे. गेल्या वर्षी तुर्कीने क्षेपणास्त्र हल्ला करत रशियाचे लढाऊ विमानही पाडले होते. यानंतर रशियाचे अध्यक्ष ब्लादिमीर पुतीन यांनी तुर्की परिणामांना सामोरे जाण्याचा इशारा दिला होता.

सिरीयातील यादवीवर चर्चा करण्यासाठी रशिया, तुर्की आणि इराणच्या परराष्ट्र मंत्र्यांची आज बैठक होणार आहे. या बैठकीच्या पार्श्वभूमीवर रशियाच्या राजदुतांच्या हत्येची ही गंभीर घटना घडली आहे. तसंच सिरीयाच्या अलेप्पोमधून नागरिकांना सुरक्षित ठिकाणी हलवण्यासाठी रशिया आणि तुर्कीचे एकसाथ प्रयत्नु सुरू आहेत. पण सिरीयामधील हस्तक्षेपालाविरोध करत तुर्कीमध्ये रशियाविरोधात या घटनेच्या एक दिवस आधी मोठे आंदोलन झाले होते.