उत्तर कोरियावर निर्बंधांचा इशारा

संयुक्त राष्ट्रे : आंतरराष्ट्रीय दबावानंतरही, उत्तर कोरियाने पाचवी अणुचाचणी घेतल्यानंतर संयुक्त राष्ट्रांच्या सुरक्षा परिषदेने नवे निर्बंध लादण्याचा इशारा दिला आहे. उत्तर कोरियाची ही अणुचाचणी आंतरराष्ट्रीय शांतता आणि सुरक्षेला धोका असल्याचे म्हटले आहे.

उत्तर कोरियाने शुक्रवारी पाचवी अणुचाचणी घेतली. ही त्यांची आतापर्यंतची सर्वांत शक्तिशाली अणुचाचणी असल्याचे मानण्यात येते. त्यांच्याकडून आंतरखंडीय क्षेपणास्त्राचीही चाचणी घेण्यात आली.

‘ब्लॅकमेल’ला प्रत्युत्तर

दरम्यान, सोलहून आलेल्या वृत्तानुसार अमेरिकेकडून अण्वस्त्राच्या माध्यमातून करण्यात येणाऱ्या ‘ब्लॅकमेल’विरोधातील संरक्षण असल्याचे सांगून, उत्तर कोरियाकडून त्यांच्या अणुकार्यक्रमाचे समर्थन करण्यात आले आहे. उत्तर कोरियाकडून सातत्याने अण्वस्त्रांची क्षमता वाढवली जात आहे, त्याविषयी दक्षिण कोरियाने चिंता व्यक्त केली आहे.