ब्रिटनमध्ये यंदाचा गणेशोत्सव ठरणार ऐतिहासिक; 'रॉयल मिंट' आणणार बाप्पाची प्रतिमा असलेले गोल्ड बार

लंडनः गणेशोत्सवासाठी अवघा एक महिना उरला आहे. गणपती बाप्पाच्या आगमनासाठी राज्यभरात जोरदार तयारी सुरू आहे. तशीच परदेशातही बाप्पाच्या आगमनाची धामधुम सुरू आहे. ब्रिटनमध्ये बाप्पाच्या स्वागताची खास तयारी केली आहे. ब्रिटनमध्ये शाही टाकसाळीकडून (रॉयल मिंट) गणपती बाप्पाच्या प्रतिमेचा छाप असलेला सोन्याची लगड अर्थात गोल्ड बार तयार करण्यात येणार आहे. हा गोल्ड बार एकूण २४ कॅरटचा असून २० ग्रॅम वजनाचा आहे. अंदाजे एक लाख रुपये किंमत असणार आहे. सुरुवातीला फक्त १० हजार गोल्ड बार विक्रीसाठी उपलब्ध असणार आहेत.

रॉयल मिंटने मागील दिवाळीत देवी लक्ष्मीची प्रतिमा असलेला गोल्ड बार तयार केला होता. परदेशात देवी- देवतांची प्रतिमा असलेले गोल्ड बार हा प्रकार पहिल्यांदाच घडला होता. देवी लक्ष्मीची प्रतिमा असलेल्या गोल्ड बारची विक्री सुरु झाल्यानंतर अवघ्या आठवड्याभरातच विकली गोली. त्यानंतर प्रशासनाला लक्ष्मी देवीच्या प्रतिमेच्या गोल्ड बार आणखी तयार करावे लागले. धनत्रयोदशीच्या दिवशी सर्वाधिक विक्रीची नोंद झाली. बहुतेक खरेदीदार ब्रिटिश भारतीय होते. ९९९.९९ शुद्ध सोने असलेला हा गोल्ड बार ब्रिटिश भारतीयांमध्ये प्रसिद्ध आहे. त्यामुळं दिवाळीसारखाच आताही या गोल्ड बारला प्रतिसाद मिळेल, असा विश्वास व्यक्त केला जात आहे.

वाचाः लायकी नसलेल्यांच्या हाती देश उभारणीचे काम; सुबोध भावेची टीका

गोल्ड बारवर असेलेले श्री गणेशाची प्रतिमा ही रॉयल मिंटच्या डिझायनर एम्मा नोबेल यांनी साकारली आहे. रॉयल मिंटने डिझाइनची गुणवत्ता सुनिश्चित करण्यासाठी कार्डिफ येथील श्री स्वामीनारायण मंदिरातील सांस्कृतिक सल्लागार आणि भक्त निलेश काबरिया यांच्याशी संपर्क साधून काम केले. काबरिया यांनी रॉयल मिंटला तपशीलवार संक्षिप्त माहिती दिली ज्यात बाप्पाचे अचूकपणे चित्रण करण्यासाठी आवश्यक असलेले सर्व घटकांचा विचार करण्यात आला. दरम्यान, ओल्डहॅममधील श्रीस्वामीनारायण मंदिराला एक गोल्ड बार कंपनीकडून देण्यात देईल. विविधता आणि समावेशासाठी आपली वचनबद्धता दर्शविणारा हा रॉयल मिंटचा आणखी एक मार्ग आहे, असं रॉयल मिंटचे मुख्य व्यावसायिक अधिकारी निकोला हॉवेल म्हणाले

वाचाः ISIS कनेक्शन प्रकरणी कोल्हापुरातून दोन भावांना ताब्यात घेतलं; मात्र नंतर समोर आलं वेगळंच सत्य