वृत्तसंस्था, ब्रसेल्स
युरोपमध्ये बेरोजगारी कमी झाल्याचे स्पष्ट झाले आहे. ऑगस्ट महिन्यात बेरोजगारीची टक्केवारी ७.४ इतकी होती. मे २००८पासून बेरोजगारीची ही नीचांकी टक्केवारी आहे. या संदर्भात अधिकृत माहिती सोमवारी प्रसिद्ध करण्यात आली.
एकच चलन वापरले जाणाऱ्या युरोपीय प्रदेशात १२.१७ दशलक्ष बेरोजगार आहेत. फॅक्टसेट या आर्थिक डेटाविषयक संस्थेच्या दाव्यानुसार ही टक्केवारी ७.५ टक्के कायम राहिली आहे. २००८मधील जागतिक मंदीच्या काळातही ही टक्केवारी तेवढीच होती. सन २०१३च्या मध्यात बेरोजगारी १२.१ टक्के इतकी वाढली होती. त्यामुळे युरोपात पुन्हा एकदा आर्थिक संकट आले होते.
युरो हे सामायिक चलन वापरणाऱ्या युरोपीय संघातील सदस्य १९ देशांपैकी बलाढ्य अशा जर्मनीमध्ये बेरोजगारीची टक्केवारी सर्वांत कमी व स्थिर अशी ३.१ टक्के आहे. त्या खालोखाल माल्टामध्ये ३.३ टक्के व नेदरलँड्समध्ये ३.५ टक्के आहे.
जूनच्या आकडेवारीनुसार, ग्रीसमध्ये बेरोजगारीने कळस गाठला असून बेरोजगारी १७ टक्के नोंदवली गेली आहे. संपूर्ण युरोपीय संघात ६.२ टक्के बेरोजगारी आहे.