चीनसोबत तणाव: अमेरिकेकडून जपानला मिळणार 'ही' भेदक मदत!

वॉशिंग्टन: चीनच्या वाढता संभाव्य धोका लक्षात घेता आता जपानने ही चीनविरोधात मोर्चेबांधणी करण्यास सुरुवात केली आहे. चीनला प्रत्युत्तर देण्यासाठी जपान आता अमेरिकेकडून एफ-३५ हे अद्यावत लढाऊ विमाने खरेदी करणार आहे. जपान तब्बल १०५ एफ-३५ विमाने खरेदी करणार आहे. यासाठी जपान अमेरिकेला तब्बल २३.११ अब्ज डॉलर देणार आहे.

अमेरिकेच्या संरक्षण विभागाने म्हटले की, परराष्ट्र विभागाने विदेश मिलिट्रा विक्री अंतर्गत २३.११ अब्ज डॉलर किंमतीचे १०५ एफ-३५ फायटर जेट आणि त्याच्याशी संबंधित उपकरणांची विक्री करण्यास परवानगी दिली आहे. जपान सरकारने ६३ एफ-३५ ए आणि ४२ एफ-३५बी फायटर जेट खरेदी करण्याची इच्छा व्यक्त केली होती. त्याशिवाय जपान लढाऊ विमानांचे इंजिन खरेदी करू इच्छितो.

वाचा: भारत-अमेरिकेमुळे चीनची कोंडी; मागितली 'या' देशाकडे मदत!
वाचा: चीनविरोधात अमेरिका उचलणार मोठे पाऊल! १५ दिवसात घेतले 'हे' मोठे निर्णय

अमेरिकेच्या संरक्षण विभागाने दिलेल्या माहितीनुसार, एफ-३५ विमानांच्या विक्रीमुळे आशियाई-पॅसिफिक भागात अमेरिकेच्या हिताच्या परराष्ट्र धोरणाच्या रक्षणाला बळ मिळणार आहे. त्याशिवाय जपानची संरक्षण क्षमताही अधिक वाढणार आहे. याआधी जपानने २०११ मध्ये ४२ एफ ३५-ए लढाऊ विमान खरेदी करण्याची इच्छा जाहीर केली होती. त्यानंतर वर्ष २०१८ मध्ये जपानच्या संरक्षण मंत्रालयाने १४७ फायटर जेट खरेदी करण्याचा निर्णय घेतला.

वाचा: चीनसोबत युद्धाचा धोका: अमेरिका, ब्रिटनचे सैन्य आशियात!

एफ-३५ विमानांची जपानमध्ये निर्मिती केली जाणार आहे. त्यासाठी आवश्यक असणारे उपकरणे, सुट्टे भाग अमेरिका देणार आहे. जानेवारी महिन्यात दोन देशांनी अमेरिकेकडे एफ-३५ विमान खरेदी करण्याची इच्छा व्यक्त केली होती. अमेरिकेकडून पोलंड ३२ एफ-३५ आणि सिंगापूर १२ एफ-३५ लढाऊ विमाने खरेदी करत आहेत. एफ-३५ ही अत्याधुनिक विमाने असून रडावर दिसत नाहीत.

दरम्यान, काही दिवसांआधी चीनच्या बॉम्बरने जपानच्या नियंत्रणातील बेटाच्या हवाई हद्दीत प्रवेश केल्यामुळे जपान आणि चीनमध्ये तणाव निर्माण झाला होता. चीनच्या या बॉम्बरला जपानच्या हवाई दलाने पिटाळून लावले. पूर्व चीन समुद्रात जपानचे नियंत्रण असलेल्या ओकिनावा आणि मियाको या बेटादरम्यान, चीनच्या एच-६ स्ट्रेटेजिक बॉम्बर आढळले. त्यानंतर जपानच्या एफ-१६ फायटर जेट्सने या बॉम्बरला पिटाळून लावले असल्याची माहिती जपानच्या संरक्षण मंत्रालयाने दिली आहे. काही दिवसआधी चीनच्या पाणबुडीने जपानच्या हद्दीत प्रवेश केला होता. त्यानंतर जपानी नौदलाने पाणबुडीला हुसकावून लावले होते.