अमेरिकेचा इराकमध्ये हल्ला; २५ दहशतवादी ठार

वृत्तसंस्था, बगदाद

अमेरिकेच्या लष्कराने रविवारी इराक आणि सीरियामध्ये हल्ला करत, इराणचा पाठिंबा असणाऱ्या दहशतवादी संघटनांना लक्ष्य केले. या हल्ल्यामध्ये २५ दहशतवाद्यांचा मृत्यू झाला आहे. या संघटनांनी गेल्या आठवड्यात केलेल्या हल्ल्यामध्ये एका अमेरिकन कंत्राटदाराचा मृत्यू झाला होता. त्याचा बदला म्हणून अमेरिकेने ही कारवाई केली आहे.

अमेरिकेचे संरक्षणमंत्री मार्क एस्पर यांनी या हल्ल्याची घोषणा केली आहे. किर्कुक भागामध्ये गेल्या आठवड्यात झालेल्या हल्ल्यात अमेरिकेच्या कंत्राटदाराचा मृत्यू झाला होता. इराक आणि सीरियामध्ये सक्रिय असणाऱ्या 'हिज्बुल्ला ब्रिगेड' या दहशतवादी संघटनेने हा हल्ला केल्याचा अमेरिकेचा आरोप आहे. या पार्श्वभूमीवर, अमेरिकेच्या लष्कराने दहशतवाद्यांना लक्ष्य करत ३० रॉकेट डागली. या हल्ल्यामध्ये १९ जणांचा मृत्यू झाल्याचे 'कताएब हिज्बुल्ला'कडून सांगण्यात आले होते. मात्र, ही संख्या वाढून २५ झाल्याची माहिती या संघटनेच्या प्रवक्त्याने सोमवारी दिली. या हल्ल्यात ५१ दहशतवादी जखमी झाले असून, बहुतेक जणांची प्रकृती गंभीर आहे. अमेरिकन नागरिकांच्या जीवावर बेतणाऱ्या इराणच्या कोणत्याही कृत्याकडे दुर्लक्ष करणार नाही, असा इशारा अमेरिकेचे परराष्ट्रमंत्री माइक पोम्पेओ यांनी म्हटले आहे.

दरम्यान, या हल्ल्यातून अमेरिकेचा दहशतवादाला पाठिंबा कायम असल्याचे पुन्हा एकदा सिद्ध झाले आहे. या हल्ल्यामुळे 'इस्लामिक स्टेट'विरोधात लढणाऱ्या संघटनांची हानी झाली आहे, अशी प्रतिक्रिया इराणच्या परराष्ट्र मंत्रालयाच्या प्रवक्त्याने अब्बास मौसवी यांनी दिली. तसेच, हा हल्ला दहशतवादाचाच एक भाग असून, अमेरिका इराकच्या सार्वभौमतेकडे दुर्लक्ष करत आहे, असा आरोपही त्यांनी केला. लेबेनॉनमधील 'हिज्बुल्ला' या दहशतवादी संघटनेनेही अमेरिकेला इशारा दिला असून, हा हल्ला करणे किती मूर्खपणाचे होते, हे अमेरिकेच्या लक्षात येईल, असे या संघटनेने म्हटले आहे.