अमेरिकेतील भारतीय करणार 'त्याचा' गौरव

मटा ऑनलाइन वृत्त । हॉस्टन

अमेरिकेतील कॅन्सस येथे वंशभेदातून झालेल्या गोळीबारात भारतीय तरुण श्रीनिवास कुचिभोतलाला वाचविण्याचा प्रयत्न करणाऱ्या २४ वर्षीय अमेरिकन तरुण इयान ग्रिलॉटचा अमेरिकेतील भारतीय पुरस्कार देऊन गौरव करणार आहेत.

गेल्या महिन्यात वंशभेदातून कॅन्ससच्या एका बारमध्ये श्रीनिवास कुचिभोतला या ३२ वर्षीय इंजिनीअरची अमेरिकेच्या एका माजी नौदल कर्मचाऱ्याने गोळ्या घालून हत्या केली होती. या गोळीबारात श्रीनिवासचा सहकारी आलोक मदासनी देखील गंभीर जखमी झाला होता. श्रीनिवास आणि आलोक यांना वाचविण्याचा प्रयत्न करताना इयान ग्रिलॉट हा अमेरिकन तरुणही जबर जखमी झाला होता. स्वतःचे प्राण धोक्यात घालून भारतीय तरुणांना वाचविण्याच्या इयानच्या शौर्याबद्दल भारतीय अमेरिकन्स त्याला 'अ ट्रु अमेरिकन हिरो' पुरस्कार देऊन सन्मानित करणार आहेत. येत्या २५ मार्च रोजी हॉस्टन येथे होणाऱ्या चौदाव्या 'इंडिया हाऊस हॉस्टन वार्षिक महोत्सवात' इयानला हा पुरस्कार देण्यात येणार आहे.



आपण या इंडिया हाऊस हॉस्टन वार्षिक महोत्सवात उपस्थित राहण्यासाठी उत्सुक असल्याचं इयान सांगतो. तो म्हणतो, 'सर्वांच्या प्रार्थना आणि सकारात्मक आधाराशिवाय मी आतापर्यंत जे करत आलोय, ते करू शकलो नसतो. इतरांच्या आशीवार्दामुळेच मी आज जिवंत आहे. सर्वांनीच मला जो आधार दिला त्यासाठी मी आभारी आहे.'

हॉस्टनमध्ये भारतीयांचे सामुदायिक कार्यक्रम तसेच 'इंडिया हाऊस' विस्तारिकरणासाठी निधी उभारणीसाठी दरवर्षी या वार्षिक महोत्सवाचे आयोजन केले जाते. 'इंडिया हाऊसच्या वर्षभरातील सर्वात मोठ्या कार्यक्रमात इयानचा गौरव करण्याची संधी मिळणं हा आमचा बहुमान' असल्याचे इंडिया हाऊस २०१७ चे अध्यक्ष आणि समिती सदस्य जितेन अग्रवाल यांनी सांगितले. इयानचे एक खरा अमेरिकन म्हणून गौरव करण्यासाठी या कौतुक सोहळ्यात सर्व हॉस्टिनिअन्सना हजर राहण्याचे आवाहनही त्यांनी केले आहे.

या वर्षी कार्यक्रमात प्रमुख पाहुणे म्हणून अमेरिकेतील भारतीय राजदूत नवतेज सरना, भारतातील माजी अमेरिकन राजदूत डेविड मलफोर्ड, माजी युएस अमेरिकन राज्य सहाय्यक सचिव निशा बिसवाल, महापौर सिल्वेस्टर टर्नर, हॅरिस काउंटी जज एड इमॅट आणि मास्टर शेफ विकास खन्ना आदी मान्यवरांना आमंत्रित करण्यात आले आहे.