USA China अमेरिकेवर चीनचा 'तिबेटीयन' वार; अमेरिकन दूतावास बंद

बीजिंग: अमेरिका आणि चीन यांच्यातील वाद आता शीतयुद्धाकडे जात असल्याचे चित्र आहे. अमेरिकेने काही दिवसांआधी ह्युस्टन येथील चीनचे महावाणिज्य दूतावास बंद केल्यानंतर चीननेदेखील कारवाई केली आहे. चीनमधील चेंगदू येथील दूतावास बंद करण्याचे आदेश दिल्यानंतर सोमवारी या कार्यालयावरील अमेरिकन ध्वज खाली उतरवण्यात आला.

व्यापार करारानंतर करोना संसर्गाच्या मुद्यावर अमेरिका आणि चीनमध्ये वाद सुरू आहेत. त्यातच चीनने हाँगकाँगमध्ये सुरक्षा कायद्याची अंमलबजावणी सुरू केल्यानंतर अमेरिकेने चीनला धडा शिकवण्यासाठी कंबर कसली. चीन-अमेरिका या दोन्ही देशातील वातावरण अधिक तणावपूर्ण होत आहेत. अमेरिकेने ह्युस्टन येथील दूतावासाला बंद करण्याचे आदेश दिल्यानंतर चीनने यावर संतप्त प्रतिक्रिया व्यक्त केली होती. ह्युस्टन येथील दूतावासातून चीन हेरगिरी करत असल्याचा आरोप अमेरिकेने केला होता. त्यानंतर चीनने चेंगदू येथील वाणिज्य दूतावास बंद करण्याचे आदेश दिले. या दूतावासातून अमेरिका तिबेटमध्ये हस्तक्षेप करत असल्याचा आरोप चीनने केला. चीनच्या राष्ट्रीय सुरक्षेला धोका निर्माण झाल्याचा आरोप चीनने केला आहे.



वाचा: अमेरिका-चीन तणाव शिगेला; चिनी महावाणिज्य दूतावास बंद करण्याचे अमेरिकेचे आदेश

वाचा: बांगलादेशला आपल्याकडे वळवण्यासाठी अमेरिका देणार मोठी भेट!

चेंगदू येथील दूतावास कार्यालयावरून अमेरिकेचा राष्ट्रध्वज खाली उतरवण्यात आल्यामुळे आता हे दूतावास बंद झाले असल्याचे समजले जात आहे. शनिवारी-रविवारी दूतावास कार्यालयातून मोठ्या प्रमाणावर सामान अनेक ट्रकमधून बाहेर काढण्यात आले. अमेरिकेला प्रत्युत्तर देण्यासाठी चेंगदू दूतावास बंद करणे अत्यावश्यक असल्याचे चीनने म्हटले होते.

वाचा: अमेरिका देणार चीनला धक्का; आणखी दूतावास बंद होणार!

दरम्यान, अमेरिकेने दूतावास बंद करण्याचे आदेश दिल्यानंतर चीनच्या दूतावासात गोंधळ उडाला होता. महावाणिज्य दूतावासातील कर्मचाऱ्यांनी मोठ्या प्रमाणावर कागदपत्रे जाळली असल्याचे समोर आले होते. दूतावास कार्यालयात दिसत असलेल्या आगीमुळे ह्युस्टन अग्निशमन दलाचे जवान घटना स्थळी दाखल झाले. मात्र, त्यांना दूतावास कार्यालयात प्रवेश नाकारण्यात आला. त्यावरून चीनच्या हेतूवर अमेरिकेने शंका उपस्थित केली होती. ह्युस्टन येथील दूतावास बंद केल्यानंतर चिनी अधिकाऱ्यांनी काही कागदपत्रे जाळली असल्याचा आरोप ट्रम्प यांनी केला. कागदपत्रे नेमकी का जाळली, हे समजले नसल्याचे ट्रम्प यांनी सांगितले. चिनी दूतावासातील कर्मचारी, अधिकारी काही कागदपत्रे जाळत असल्याचा व्हिडिओ समोर आला होता. त्यानंतर अनेक प्रश्न उपस्थित झालेत. डोनाल्ड ट्रम्प यांनी आगामी काही दिवसांत आणखी काही दूतावास बंद होणार असल्याचे संकेत दिले आहेत.