US Election: सर्वाधिक करोनाबाधित भागात मतदारांची 'या' उमदेवाराला पसंती

वॉशिंग्टन: अमेरिका राष्ट्राध्यक्षपदाच्या निवडणुकीत करोना महासाथीचा मुद्दा मोठ्या प्रमाणावर चर्चिला गेला. करोनाच्या मुद्यावर ट्रम्प यांना घेरण्याचाही प्रयत्न डेमोक्रॅटीक पक्षाने केला. अमेरिकेत सर्वाधिक करोनाबाधित भागांमध्ये कोणत्या उमेदवाराला मतदारांनी पसंती दिली, याचे सर्वेक्षण समोर आले आहे.

वृत्तसंस्था 'एसोसिएटेड प्रेसने' (एपी) दिलेल्या वृत्तानुसार, ज्या कौंटी भागात करोनाने सर्वाधिक थैमान घातले. त्या ठिकाणी ट्रम्प यांना सर्वाधिक मतदान मिळाले आहे. जवळपास ३९३ काउंटी भागात करोनाच्या सर्वाधिक बाधितांची नोंद करण्यात आली. त्यातील जवळपास ९३ टक्के काउंटीमध्ये ट्रम्प यांना चांगली मते मिळाली आहेत. यामध्ये मोठा भाग हा ग्रामीण भाग आहे. करोनाची परिस्थिती हाताळण्यात ट्रम्प यांना अपयश आले. त्यामुळे लोकांच्या नाराजीचा फटका त्यांना बसण्याची शक्यता वर्तवण्यात येत होती. सर्वेक्षण करण्यात आलेल्या काउंटीमध्ये जवळपास ९५ टक्के मतमोजणी पूर्ण झाली होती.

वाचा: ट्रम्प यांच्याकडून फेक न्यूजचा भडिमार; वृत्तवाहिन्यांनी बंद केले लाइव्ह भाषण

सर्वेक्षणात अनेकांनी करोनावर नियंत्रण मिळवण्यात यश आले असल्याचे म्हटले आहे. तर, काहींच्या म्हणण्यानुसार अद्यापही करोनावर नियंत्रण मिळवता आले नाही. आता या सर्वेक्षणावरही चर्चा सुरू झाली आहे.

वाचा: US Election: पुन्हा मतमोजणी झाल्यास ट्रम्प यांचा विजय?

अमेरिकेत करोनाच्या मुद्यावर मोठ्यावर चर्चा झडली होती. अध्यक्षयीय वादविवादतही ट्रम्प यांच्यावर निशाणा साधण्यात आला होता. अमेरिकेत सर्वाधिक करोनाबाधित आहेत. अमेरिकेतील करोनाबाधितांची संख्या ९९ लाखांहून अधिक झाली असून दोन लाख ४१ हजारजणांचा करोनाच्या संसर्गाने मृत्यू झाला आहे. तर, ६३ लाख ४१ हजार बाधितांवर यशस्वी उपचार करण्यात आले.

वाचा: ट्रम्प यांना धक्का; जॉर्जिया आणि मिशिगनमध्ये याचिका फेटाळली

दरम्यान, राजकीय अस्थिरतेच्या पार्श्वभूमीवर ट्रम्प समर्थक आणि विरोधकांची अमेरिकेत निदर्शने सुरू झाली आहेत. हिंसाचार उफाळून येण्याची शक्यता लक्षात घेऊन पोलीस बंदोबस्तात वाढ करण्यात आली आहे. तर, विविध शहरातून ५०हून अधिकजणांना पोलिसांनी अटक केली आहे. ट्रम्प समर्थकांसह विरोधकही रस्त्यांवर उतरले असून त्यांनी प्रत्येक मत मोजण्याची मागणी केली आहे.