‘शट डाउन’ संपल्यानंतरच बीजभाषण

वॉशिंग्टन : अमेरिका-मेक्सिको सीमेवर भिंत बांधण्यासाठी निधी तरतुदीवरून डेमोक्रॅटिक पक्षाबरोबर झालेल्या तीव्र मतभेदानंतर ट्रम्प यांनी एक पाऊल मागे घेत त्यांचे नियोजित बीजभाषण पुढे ढकलले आहे. अमेरिकेतील 'शट डाउन' संपल्याशिवाय बीजभाषण करणार नसल्याचे अमेरिकेचे अध्यक्ष डोनाल्ड ट्रम्प यांनी घोषित केले आहे.

सभागृहात बीजभाषणासाठी ट्रम्प यांना असलेले निमंत्रण प्रतिनिधीगृहाच्या अध्यक्ष नॅन्सी पेलोसी यांनी रद्द केल्यामुळे बीजभाषणावरील वाद चिघळला होता. ट्रम्प आणि डेमोक्रॅटिक पक्षामधील वादामुळे अमेरिकेच्या इतिहासातील आतापर्यंतचा सर्वांत मोठा हा 'शट डाउन' आहे. सीमेवरील भिंतीसाठी ट्रम्प यांनी ५.७ अब्ज डॉलरच्या निधीची मागणी केली आहे. प्रतिनिधीगृहामध्ये बहुमतात असलेल्या डेमोक्रॅटिक पक्षाने मात्र इतक्या निधीची तरतूद करण्यास विरोध केला आहे. 'शट डाउन'मुळे २२ डिसेंबरपासून आठ लाख कर्मचाऱ्यांचे पगार कापले जात आहेत. पेलोसी यांनी विषेधाधिकारांर्गत बीजभाषणाची तारीख पुढे ढकलण्यास सांगितले, असे ट्रम्प यांनी म्हटले आहे. 'मेक्सिको सीमेवर भिंत बांधणे हाच बेकायदा स्थलांतरितांना, ड्रग्ज तस्करांना रोखण्याचा मार्ग आहे. अमेरिकेमध्ये गुणवत्तेवर आधारित लोक यावेत, असेही ट्रम्प यांनी म्हटले आहे.

'चीन व्यापार करार करण्यास उत्सुक'

'अमेरिकेने चीनच्या उत्पादनांवर लावलेल्या करांमुळे चीनचे कंबरडे मोडले असून अमेरिकेबरोबर चीन व्यापार करार करण्यास उत्सुक आहे,' असे वक्तव्य अमेरिकेचे अध्यक्ष डोनाल्ड ट्रम्प यांनी गुरुवारी केले. अमेरिका आणि चीन यांच्यादरम्यान गेल्या वर्षापासून व्यापार युद्ध सुरू आहे. दोन्ही देश परस्परांच्या मालावरील जकात वाढवित आहेत. ट्रम्प म्हणाले, 'चीनला आमच्याशी व्यापार करार करण्याची खूप इच्छा आहे. यातून पुढे काय होते, ते पाहू. आर्थिक पातळीवर आमची कामगिरी अतिशय चांगली आहे. जकातीमुळे चीनची स्थिती फारशी चांगली नाही.' चीनचे व्यापारी शिष्टमंडळ अमेरिकेला भेट देण्याच्या पार्श्वभूमीवर त्यांनी हे वक्तव्य केले.

'शट डाउन' सुरू असल्यामुळे पेलोसी यांनी देशाला उद्देशून बीजभाषण करण्यास सांगितले. त्यानंतर त्यांनी विचार बदलला आणि भाषण पुढे ढकलण्यास सांगितले. हा त्यांचा विशेषाधिकार आहे. शट डाउन संपल्यानंतर मी बीजभाषण करीन.

डोनाल्ड ट्रम्प, अध्यक्ष, अमेरिका