वृत्तसंस्था, रियाध/काबूल
अमेरिकेचा तालिबानबरोबरील शांतता करार दृष्टीपथात आला असून, २९ फेब्रुवारी रोजी या करारावर सह्या होण्याची शक्यता आहे. अफगाणिस्तानात शनिवारपासून आठवडाभर 'हिंसाचारमुक्त' वातावरण ठेवण्याचे दोन्ही बाजूंमध्ये ठरले आहे. त्यातून विश्वास निर्मिती करण्याचा प्रयत्न आहे.
अमेरिकेचे परराष्ट्रमंत्री माइक पोम्पिओ यांनी सौदी अरेबियाच्या दौऱ्याच्या अखेरीस या कराराविषयी माहिती दिली. 'आठवडाभर हिंसाचार न होऊ देण्याबद्दलच्या सामंजस्याच्या अंमलबजावणीनंतर अमेरिका आणि तालिबान यांच्यातील करारावर सह्या होणार आहेत. कायमस्वरूपी शांतता प्रस्थापित होण्याच्या दृष्टीने हे महत्त्वाचे पाऊल आहे. आव्हाने कायम असतील, तरीही या प्रगतीने आशा निर्माण झाली आहे आणि अफगाणिस्तानच्या जनतेने या संधीचे सोने करावे, असे आवाहन अमेरिका करत आहे,' असे पोम्पिओ यांनी म्हटले आहे.
दरम्यान, हा हिंसाचारमुक्त सप्ताह शनिवारपासून सुरू होत असल्याचे अफगाणिस्तानच्या राष्ट्रीय सुरक्षा परिषदेचे प्रवक्ते जावेद फैझल यांनी जाहीर केले. अफगाणिस्तानातील अमेरिकेचे लष्कर किंवा अफगाणिस्तान सुरक्षा दलांकडून याविषयी कोणतीही प्रतिक्रिया देण्यात आलेली नाही, तर तालिबानच्या एका प्रवक्त्याने या वृत्ताला दुजोरा दिला.
अमेरिकेला अफगाणिस्तानातील त्यांचे सैन्य माघारी घ्यायचे आहे. त्याआधी तालिबानबरोबर शांतता करार करण्यासाठी अमेरिका प्रयत्नशील आहे. यासाठी वर्षभरापासून चर्चाही करण्यात येत आहे. आठवडाभराच्या शांततेतून, तालिबान त्यांच्या गटांवर नियंत्रण करू शकते, हेच दिसून येते. त्यामुळे, अमेरिकेसाठी हा आठवडा महत्त्वाचा आहे.