एस ४०० करार: भारताला अमेरिकेची धमकी

वॉशिंग्टन

रशियाकडून भारत घेत असलेल्या एस ४०० हवाई संरक्षण यंत्रणा प्रणाली खरेदीवर अमेरिकेने आक्षेप घेतला आहे. हा करार भारताच्या हिताचा नसून अमेरिकेसोबतच्या संबंधावर परिणाम होऊ शकतो. त्यामुळे भारताने हा करार रद्द करावा अशी धमकी अमेरिकेने दिली आहे.

अमेरिकेचे परराष्ट्र विभागाचे सहाय्यक सचिव अलाइस वेल्स यांनी सांगितले की, दक्षिण आशियातील देशांनी कोणाकडून शस्त्र खरेदी करावे हा त्यांचा निर्णय आहे. करारानुसार, भारताने अमेरिकेकडून अधिक शस्त्रे खरेदी करायला हवी. मात्र, भारत रशियाकडून एस-४०० हवाई संरक्षण यंत्रणा प्रणाली खरेदी करत आहे.

अमेरिकेचे परराष्ट्र मंत्री माइक पोंपिया यांच्या भारत दौऱ्यापूर्वीच ओसाका येथे होणाऱ्या जी-२० राष्ट्रांच्या बैठकीत पंतप्रधान नरेंद्र मोदी आणि अमेरिकेचे राष्ट्राध्यक्ष डोनाल्ड ट्रम्प यांची भेट होण्याची शक्यता आहे. ट्रम्प सरकार भारताला संरक्षण क्षेत्रात मदत करू इच्छिते. भारत हा अमेरिकेचा संरक्षण करारातील मोठा भागिदार आहे. अमेरिकेने भारताला एस ४०० पेक्षा पॅट्रियॉट-३ क्षेपणास्त्र खरेदी करण्याची ऑफर दिली होती, अशी माहिती वेल्स यांनी दिली.

रशियाचे राष्ट्रपती पुतीन आणि पंतप्रधान मोदी यांच्यात झालेल्या दीर्घ चर्चेनंतर पाच अब्ज डॉलरचा करार करण्यात आला. यामध्ये 'एस ४००'चा ही समावेश आहे. रशिया आणि भारत यांच्यात दीर्घकाळापासून मैत्री आहे. त्यामुळे हा करार रद्द झाल्यास दोन्ही देशांच्या संबंधावर परिणाम होण्याची भिती आहे.