अमेरिकेत एकाच दिवसात ६० हजार बाधित; मास्क वापराबाबत 'हे' निर्देश!

वॉशिंग्टन: अमेरिकेत पुन्हा एकदा करोनाच्या संसर्गाने जोर पकडला आहे. अमेरिकेत एकाच दिवसात ६० हजारांहून अधिक बाधितांची नोंद करण्यात आली आहे. यामुळे अमेरिकेत चिंता व्यक्त करण्यात येत आहे. संसर्गाच्या दृष्टीने अतिधोकादायक असलेल्या भागांमध्ये लसीकरण झालेल्या नागरिकांना पुन्हा एकदा मास्कचा वापर करणे अनिवार्य करण्यात आले आहे. याआधी लसीकरण झालेल्या व्यक्तिंना मास्कच्या अनिवार्य वापरातून वगळण्यात आले होते.

अमेरिकेतील आजार नियंत्रण आणि प्रतिबंध संस्थेचे (सीडीसी) महासंचालक रोशेल वेलेंस्की यांनी म्हटले की, लस प्रभावी आहे. मात्र, करोनाच्या डेल्टा वेरिएंटमुळे संसर्गाचा धोका वाढला आहे. त्यामुळे स्वत: चा आणि इतरांचा आजारापासून बचाव करण्यासाठी मास्कचा वापर करावा लागणार आहे. अमेरिकेचे राष्ट्राध्यक्ष जो बायडन यांनी करोनाबाधितांच्या वाढत्या संख्येबाबत चिंता व्यक्त केली आहे. लसीकरण आणि मास्कच्या वापरामुळे संसर्गावर नियंत्रण ठेवता येणे शक्य होणार आहे.

वाचा: दोन्ही डोस घेतल्यानंतर 'इतक्या' दिवसांत कमी होतोय लशींचा प्रभाव!

अमेरिकेत २७ जुलै रोजी ६१ हजारबाधितांची नोंद करण्यात आली. याआधीदेखील २३ जुलै रोजी ६९ हजारबाधितांची नोंद करण्यात आली होती. काही दिवसांपासून ६० हजारांहून अधिक बाधितांची नोंद करण्यात येत असल्यामुळे प्रशासनाने चिंता व्यक्त केली आहे.

वाचा: करोना: दोन भिन्न लशीच्या मिश्र डोसमुुळे झाला 'हा' परिणाम!

सीडीसीच्या आकडेवारीनुसार, करोनाच्या डेल्टा वेरिएंटचा प्रभाव दक्षिण अमेरिकेत अधिक आहे. दक्षिण अमेरिकेत मोठ्या प्रमाणावर बाधितांची संख्या आढळून येत आहे. करोना प्रतिबंधक लस घेतलेल्यांनाही डेल्टा वेरिएंटची लागण होत असल्याने चिंता व्यक्त केली जात आहे.