बांगलादेशमध्ये धर्मांधाकडून हिंदू मंदिरावर, घरांवर हल्ले; १० जण अटकेत

ढाका: पाकिस्तानमध्ये अल्पसंख्यक हिंदूंच्या मंदिरांवर हल्ला झाल्याची घटना समोर असताना बांगलादेशमध्येही अशीच घटना समोर आली आहे. खुलना जिल्ह्यातील गौरा गावात धर्मांध कट्टरतावाद्यांनी हिंदू मंदिरांवर हल्ला करत तोडफोड केली. मंदिरांतील देवतांच्या मूर्त्यांचेही नुकसान केले. या प्रकरणी पोलिसांनी शनिवारी १० जणांना अटक केली आहे.

शनिवारी सायंकाळी पाच ते सहा वाजण्याच्या दरम्यान हा हल्ला झाल्याचे वृत्त आहे. शियाली, मलिकपुरा आणि गोवरा गावात शेकडो कट्टरतावादी, धर्मांध एकत्र आले त्यांनी मंदिर व हिंदू घरांवर हल्ले केले. या हल्ल्यात सहा मंदिराची नासधूस झाली. तर, ५७ हून अधिक हिंदू कुटुंबावर हल्ला झाला. काही घरांना आग लावण्यात आली. तर घरे, दुकानांची लूट करण्यात आली.

पाकिस्तान: गणेश मंदिरावरील हल्ल्याप्रकरणी ५० अटकेत
पोलिसांनी शनिवारी रात्री उशिरा छापेमारीत या हल्ल्यातील १० संशयितांना अटक केली असल्याचे वृत्त बांगलादेशमधील 'ढाका ट्रिब्युन'ने दिले आहे.

वादाचे कारण काय?

काही स्थानिक माध्यमांनी दिलेल्या वृत्तानुसार, शुक्रवारी रात्री वाद झाला. नमाजाच्या वेळी सुरू असलेल्या भजनाच्या मुद्यावरून हा वाद झाल्याचे वृत्त स्थानिक माध्यमांनी दिले. या वादाला शनिवारी हिंसक वळण लागले.

पाकिस्तान: हिंदू मंदिराची तोडफोड; सुप्रीम कोर्ट संतप्त, आरोपींना अटक करण्याचे निर्देश
हिंसक हल्ल्यात ३० हून अधिकजण जखमी झाले आहेत. रुग्णालयात त्यांच्यावर उपचार सुरू आहेत. बांगलादेश हिंदू युनिटी काउंसिलने या हल्ल्याचा निषेध केला आहे. या घटनेनंतर बांगलादेशमधील अल्पसंख्याक समुदायात भीतीचे वातावरण आहे. बांगलादेश हिंदू-बौद्ध-ख्रिश्चन एकता परिषदेने या घटनेचा निषेध केला आहे.