धक्कादायक! कंडोम धुवून पुन्हा विकणारे अटकेत; तीन लाख कंडोम जप्त

हुनाई: स्वत: च्या फायद्यासाठी लोक काय करतील याचा नेम नाही. यासाठी दुसऱ्यांचा जीवही धोक्यात घातला जातो. वापरलेले कंडोम धुऊन पुन्हा विकणाऱ्यांना व्हिएतनाममधील पोलिसांनी अटक केली आहे. पोलिसांनी त्यांच्याकडून एका गोदामात ठेवलेले सुमारे तीन लाख २४ हजार वापरलेले कंडोम जप्त केले आहेत.

व्हिएतनाममधील सरकारी वृत्तवाहिनी व्हीटीवीने दिलेल्या वृत्तानुसार, दक्षिण प्रातांतील बिन्ह दुओंगमधील एका गोदामात वापरेले कंडोम असलेले जवळपास १२ गोणी आढळल्या. या गोण्यांचे वजन जवळपास ३६० किलो होते. या गोदामाच्या मालकाने सांगितले की, आरोपींना एका अज्ञात व्यक्तींकडून त्यांना दर महिन्याला वापरेल्या कंडोमची बॅग मिळत होती. पोलिसांनी या छाप्यात एका महिलेलाही ताब्यात घेतले आहे. या महिलेने सांगितले की, वापरलेले कंडोम उकळत्या पाण्यात टाकले जायचे. त्यानंतर त्यांना सुकवले जायचे. महिलेने सांगितले की, या सुकवलेल्या कंडोमला लाकडी लिंगाच्या आधारे पुन्हा आकार दिला जात होता. त्यानंतर कंडोमची पॅकेजिंग करून त्यांची विक्री केली जात होती. आतापर्यंत या कंडोमची किती विक्री झाली, याबाबत नेमकी माहिती समोर आली नसल्याचे वृत्तात म्हटले आहे. या महिलेला कंडोमच्या वजनाप्रमाणे कामाचे पैसे मिळत होते.

वाचा: बापरे! ऑस्ट्रेलियात एकाच वेळी ३८० व्हेल माशांचा मृत्यू

वाचा: काय, घेणार का करोना चॅलेंज? शरीरात सोडला जाणार करोना विषाणू

कंडोमच्या वापरानंतर त्याची तात्काळ विल्हेवाट लावणे आवश्यक आहे. कंडोमला एक वैद्यकीय वस्तू समजले जाते आणि गोदामाच्या मालकाने आणखी किती कायद्याचे उल्लंघन केले याचीही माहिती घेत असल्याचे एका सरकारी अधिकाऱ्यांनी सांगितले. या कंडोमची विक्री जवळील दुकाने, लॉजवर केली जात असल्याचे स्थानिकांनी सांगितले.