सातव्या मजल्यावरुन कोसळली 'बीएमडब्ल्यू'!

मटा ऑनलाइन वृत्त। टेक्सास (अमेरिका)

कल्पना करा, की एखादी कार सातव्या मजल्यावरुन गाडी खाली पडली तर काय होईल? एक तर या गाडीचा चक्काचूरच होईल आणि दुसरे म्हणजे गाडीतील कुणीही वाचू शकणार नाही. मात्र हे खोटे ठरवणारी घटना अमेरिकेच्या टेक्सासमधील ऑस्टीन या शहरात घडली आहे. टेक्सास शहरातील एका इमारतीच्या सातव्या मजल्यावरून एक बीएमडब्ल्यू कार रस्त्यावर कोसळली. आश्चर्य म्हणजे गाडीतील ड्रायव्हर सुरक्षित आहे.

ही घटना घडली १३ जुलैला. मात्र ऑस्टीन पोलिसांनी या घटनेचा व्हिडीओ गेल्या रविवारी प्रसिद्ध केला व अल्पावधीतच इंटरनेटवर हा व्हिडीओ व्हायरल झाला. एक एसयूव्ही कार पार्किंग तळावरून बाहेर निघत असतानाच अचानक एक बीएमडब्लू कार सातव्या मजल्यावरुन खाली कोसळली. आश्चर्याची बाब म्हणजे सातव्या मजल्यावरुन खाली पडूनही गाडीतील ड्रायव्हर मात्र सुरक्षित आहे याबाबत सगळीकडे आश्चर्य व्यक्त होत आहे.

अपघातग्रस्त कारच्या ड्रायव्हरने ब्रेक मारण्याऐवजी चुकून अॅक्सलेरेटर दाबल्याने गाडीचा वेग वाढला व गाडी पार्किंग तळाच्या भिंतीला जाऊन धडकली आणि तिथून खाली कोसळली.

गाडी खाली कोसळल्याची ही काही पहिलीच घटना नाही. याआधीही नवव्या मजल्यावरुन एक कार खाली पडता पडता वाचली. ही गाडी कोसळत असताना मध्ये असलेल्या विजेच्या तारांमध्ये अडकली. त्यामुळे ती खाली कोसळली नाही.