Mrs Srilanka 2021 पाहा: 'मिसेस श्रीलंका' स्पर्धेत जोरदार राडा; विजेती स्पर्धक जखमी

कोलंबो: श्रीलंकेत रविवारी पार पडलेल्या 'मिसेस श्रीलंका' सौंदर्य स्पर्धेत जोरदार राडा झाला. या स्पर्धेत विजेती ठरलेली पुष्पिका डीसिल्वाला देण्यात आलेला विजेतेपदाचा मुकुट 'मिसेज वर्ल्ड' कॅरोलिन जूरीने हिसकावून घेतला आणि उपविजेत्या महिलेला दिला. या सगळ्या भांडणात पुष्पिकाच्या डोक्याला जखम झाली. या घटनेची सध्या सगळीकडे जोरदार चर्चा सुरू आहे.

कोलंबोत झालेल्या या स्पर्धेचे थेट प्रसारण राष्ट्रीय वाहिन्यांवर करण्यात येत होते. या स्पर्धेत पुष्पिका डीसिल्वा विजयी ठरली. तिला विजेतेपदाचा मुकुटही देण्यात आला. मात्र, विद्यमान 'मिसेस वर्ल्ड' असलेल्या कॅरोलिनने व्यासपीठावरच तिला देण्यात आलेला मुकुट हिसकावला आणि उपविजेत्या स्पर्धकाला दिला. पुष्पिका डीसिल्वाचा घटस्फोट झाला असल्यामुळे ती या विजेतपदासाठी अपात्र असल्याचे कारण कॅरोलिनाने दिले. या स्पर्धेत घटस्फोटीत महिला सहभागी होऊ शकत नाही.

वाचा: दुबई: 'या' कारणांमुळे बाल्कनीमध्ये नग्नावस्थेत सुरू होती महिलांची स्टंटबाजी


पुष्पिकाचा मुकुट काढत असताना तिला जखम झाली. भर मंचावर झालेला अपमान पाहून दुखावलेल्या पुष्पिका डीसिल्वाने रडतच मंच सोडला. त्यानंतर आयोजकांनी झाल्या प्रकाराबाबत तिची माफी मागितली. आयोजकांनी तिचा विजेतेपदाचा मुकुटही परत दिला. पुष्पिका डीसिल्वा ही वर्ष २०११ मध्ये 'मिस श्रीलंका' स्पर्धेची विजेती होती.

वाचा: आम्हीही फ्रंटलाईन वर्कर; लशीच्या मागणीसाठी देहविक्री करणाऱ्या महिलांचा संप

वाचा: होय, एस्ट्राजेनकाच्या करोना लशीमुळे मेंदूत रक्ताची गाठ, पण...

जखमी झालेल्या पुष्पिका डीसिल्वावर एका रुग्णालयात उपचार करण्यात आले. आपल्यासोबत झालेला प्रकार हा अपमानास्पद आणि अन्यायकारक असल्याचे पुष्पिका डीसिल्वाने म्हटले. आपण पतीसोबत राहत नाही. मात्र, घटस्फोट झाला नसल्याचे तिने सांगितले. मिसेस वर्ल्ड कॅरोलिनच्या वर्तवणुकीवरही टीका सुरू आहे.