'इस्लामिक दहशतवाद संपवणार'

मटा ऑनलाइन वृत्त । वॉशिंग्टन

डोनाल्ड ट्रम्प यांनी अमेरिकेच्या अध्यक्षपदाची शपथ घेतल्यानंतर निवडणुकीदरम्यान दिलेला 'अमेरिकेला पुन्हा महान बनवूया' हा संकल्प (वुई मेक अमेरिका ग्रेट अगेन) आणखी बुलंद केला. मी जे करेन ते फक्त अमेरिकेन जनतेच्या हिताचंच असेल. 'बाय अमेरिकन, हायर अमेरिकन' हेच धोरण राबवेन. जे गमावलं ते सर्व तुम्हा परत मिळवून देण्याचा माझा संकल्प आहे. इतिहास मागे सोडून अमेरिकी हातांनीच अमेरिका घडवायची आहे, असा संकल्प ट्रम्प यांनी आज सोडला. ट्रम्प यांनी आपल्या छोटेखानी भाषणात दहशतवादासह विविध समस्यांवर भूमिका स्पष्ट केली. जगातून इस्लामिक दहशतवादाचे नामोनिशाण मिटवण्याची गर्जनाच यावेळी ट्रम्प यांनी केली.

ट्रम्प यांनी भाषणाच्या सुरुवातीलाच जगभरातील लोकांचे आभार मानले तसेच मावळते अध्यक्ष बराक ओबामा यांच्या कार्याचा गौरव केला. ट्रम्प म्हणाले, आपला रंग कोणताही असोत आम्ही सारे अमेरिकी आहोत ही भावनाच महत्त्वाची आहे. आता फक्त अमेरिका, अमेरिका आणि अमेरिका हे एकच लक्ष्य असणार आहे. अमेरिकेच्या हितालाच प्राधान्य राहिल. आता चर्चेची गुऱ्हाळं करत बसण्याची वेळ संपली आहे. आता थेट 'अॅक्शन' घेतली जाईल.

आम्ही ट्रिलियन डॉलर खर्च केले. दुसऱ्या देशांना श्रीमंती दाखवली मात्र यापुढे हे होणार नाही. सर्वात आधी अमेरिकेचा, येथील जनतेच्या हितांचाच विचार केला जाईल. तुम्ही गमावलेला रोजगार, तुमचा व्यापार, तुमची स्वप्ने सगळं काही तुम्हाला परत मिळेल. दुसऱ्या देशांशी सलोखा साधतानाही प्रथम देशाचं हित पाहिलं जाईल, असा विश्वास ट्रम्प यांनी दिला.