White House बापरे! व्हाइट हाउसमध्ये फर्स्ट लेडीच्या प्रसाधनगृहावर होणार 'इतक्या' कोटींचा खर्च

वॉशिंग्टन: अमेरिकेची सत्ता सूत्रे हाती घेण्याआधीच नियोजित राष्ट्राध्यक्ष जो बायडन एका वेगळ्याच कारणांसाठी चर्चेत आले आहेत. अमेरिकन राष्ट्राध्यक्षांचे कार्यालय असलेल्या व्हाइट हाउसमध्ये प्रसाधनगृहाच्या नुतनीकरणासाठीतब्बल १.२ दशलक्ष डॉलर म्हणजे जवळपास ९ कोटी रुपयांचा खर्च करण्यात येणार आहे. या मुद्यावर बायडन विरोधकांच्या निशाण्यावर आले असून हा खर्च म्हणजे करदात्यांच्या पैशांचा चुराडा असल्याची टीका करण्यात येत आहे. हे प्रसाधनगृह फर्स्ट लेडीच्या वापरासाठी असल्याचे म्हटले जात आहे.

एका स्थानिक वृत्तपत्राने दिलेल्या वृत्तानुसार, या प्रसाधनगृहाचे नुतनीकरणाचे काम फर्स्ट लेडीच्या कार्यालयाजवळ करण्यात येत आहे. या प्रसाधनगृहाच्या बांधकामाबाबतची कोणतीही माहिती देण्यात आली नाही. हे काम मे महिन्यापर्यंत पूर्ण होणार आहे. याआधी जो बायडन व्हाइट हाउसमध्ये येण्याआधी साफसफाईसाठी एक लाख २७ हजार डॉलर मंजूर करण्यात आले होते.

वाचा: ट्रम्प यांचा गुन्हा महाभियोगास पात्र; रिपब्लिकन पक्षातून उमटला सूर
फर्स्ट लेडी जिल बायडन करणार हा विक्रम

डोनाल्ड ट्रम्प यांचा पराभव केल्यानंतर जो बायडन २० जानेवारी रोजी अमेरिकेच्या राष्ट्राध्यक्षपदाची शपथ घेणार आहेत. तर, बायडन यांची पत्नी जिलबायडन यादेखील फर्स्ट लेडी म्हणून एक विक्रम करणार आहेत. शिक्षक असलेल्या जिलबायडन यांच्याकडे चार पदव्या आहेत. व्हाइट हाउसमध्ये 'फर्स्ट लेडी' म्हणून कर्तव्य बजावत असताना त्या अध्यापनाचे काम सुरूच ठेवणार आहेत. अमेरिकेच्या २३१ वर्षात पहिल्यांदाच एखादी फर्स्ट लेडी व्हाइट हाउसबाहेर काम करून वेतन कमावणार आहे.

वाचा: पाहा: इंडोनेशियाच्या अपघातग्रस्त विमानाचे अवशेष; ६२ जण ठार

जिलबायडन या उत्तर व्हर्जिनिया कम्युनिटी कॉलेजमध्ये इंग्रजीच्या पूर्णवेळ प्राध्यापिका आहेत. फर्स्ट लेडी झाल्यानंतरही आपण अध्यापनाचे काम सुरूच ठेवणार असल्याचे त्यांनी निवडणुकी दरम्यानच्या एका मुलाखतीत म्हटले होते. बराक ओबामा यांच्या कार्यकाळात बायडन हे उपराष्ट्रपती होते. त्यावेळीही जिलबायडन यांनी अध्यापनाचे काम सुरू ठेवले होते.