‘इन्फोसिस’च्या निर्णयाचे अमेरिकेकडून स्वागत

वॉशिंग्टनः पुढील दोन वर्षांमध्ये अमेरिकेतील दहा हजार नागरिकांना कंपनीमध्ये नोकरी देण्याच्या ‘इन्फोसिस’च्या निर्णयाचे डोनाल्ड ट्रम्प प्रशासनाने स्वागत केले आहे. अमेरिकेत विकास व्हावा, या दृष्टीने ट्रम्प प्रशासन जो अजेंडा राबवत आहे, त्याचेच हे यश आहे, अशी प्रतिक्रिया व्यक्त करण्यात आली आहे.

अमेरिकेतील दहा हजार व्यक्तींना नोकरी देण्याचा; तसेच अमेरिकेत चार नावीन्यपूर्ण संशोधन केंद्रे उभारण्याचा निर्णय ‘इन्फोसिस’चे मुख्य कार्यकारी अधिकारी विशाल सिक्का यांनी जाहीर केला होता. त्यावर अमेरिकेच्या ट्रम्प प्रशासनाने बुधवारी प्रतिक्रिया दिली.

‘ट्रम्प प्रशासनाने स्थानिक नागरिकांना रोजगार मिळवून देण्यासाठी घेतलेल्या निर्णयांचा हा विजय आहे. अमेरिकेतील नोकऱ्या बाहेरच्या देशांतील तरुणांच्या हातात जाऊ न देता, स्थानिक गुणवत्तेला प्राधान्य देण्यासाठी ट्रम्प प्रशासन प्रयत्नशील आहे. त्याचेच हे फलित म्हटले पाहिजे,’ असे ‘वॉशिंग्टन पोस्ट’ या वृत्तपत्राला जारी केलेल्या निवदेनामध्ये ‘व्हाइट हाऊस’ने म्हटले आहे.

‘इन्फोसिससारख्या कंपनीला अमेरिकेमध्ये पुन्हा एकदा मोठ्या प्रमाणावर गुंतवणूक करावीशी वाटते, ही आशादायक गोष्ट आहे. अमेरिकेच्या अर्थव्यवस्थेच्या दृष्टीने हे चांगले लक्षण आहे,’ असे स्पष्ट केले.