जगातील शक्तिशाली पासपोर्टच्या यादीत चीन, UAE ला फायदा; भारताला मोठा झटका!

रियाध: जगातील सर्वात शक्तिशाली पासपोर्टची क्रमवारी जाहीर करण्यात आली आहे. वर्ष २०२१ मधील क्रमवारीत जपान सर्वोच्च स्थानावर आहे. तर, चीन आणि संयुक्त अरब अमिराती या देशांच्या क्रमवारीत सुधारणा झाली. भारताला या यादीत मोठा झटका बसला आहे. भारताची घसरण झाली असून ९० व्या स्थानी आहे. सर्वात खराब पासपोर्टच्या यादीत अफगाणिस्तान (११६ वा क्रमांक) शेवटच्या क्रमांकावर आहे.

हेनले पासपोर्ट इंडेक्सनुसार, या वर्षी पुन्हा जपान पहिल्या स्थानावर आहे. जपानचा पासपोर्ट असलेल्या व्यक्तींना १९३ देशांमध्ये व्हिसाशिवाय अथवा व्हिसा ऑन अरायव्हलची सुविधा आहे. या यादीत दुसऱ्या स्थानावर सिंगापूर आहे. सिंगापूरच्या पासपोर्टधारकांना जगातील १९२ देशांमध्ये व्हिसा बाबतच्या नियमांमध्ये सवलत आहे. त्यानंतर दक्षिण कोरिया आणि जर्मनीचा क्रमांक लागतो. या दोन्ही देशांच्या पासपोर्टधारकांना १९१ देशांमध्ये व्हिसाबाबतच्या नियमांमध्ये शिथिलता मिळते. अमेरिका आणि ब्रिटन सातव्या क्रमांकावर आहे.

वाचा: स्टॅन स्वामींच्या निधनाचे जागतिक पडसाद; संयुक्त राष्ट्रे, युरोपीय संघाकडून दखल

या यादीत चीन आणि संयुक्त अरब अमिरातीला मोठा फायदा झाला आहे. दोन्ही देशांच्या क्रमवारीत सुधारणा झाली आहे. शक्तिशाली पासपोर्टच्या यादीतील पहिल्या १० देशामध्ये युरोपीयन देशांची संख्या मोठी आहे. वर्ष २०११ नंतर चीनच्या स्थानात २२ क्रमांकाने सुधारणा झाली आहे. चीन आता ९० व्या स्थानावरून ६५ व्या स्थानांवर आला आहे. तर, संयुक्त अरब अमिरातीने ६५ व्या स्थानावरून थेट १५ व्या स्थानावर झेप घेतली आहे. संयुक्त अरब अमिरातीने मागील एक दशकात इतर देशांसोबत आपले राजनयिक संबंध अधिक चांगले केले आहेत. त्यामुळेच १७४ देशांमध्ये युएईच्या नागरिकांना सहज प्रवेश मिळतो. याआधी दशकभरापूर्वी ही संख्या ६७ इतकी होती.

वाचा: पेशावरच्या आठवणीत रमायचे दिलीपकुमार; पाकिस्तानने दिला होता सर्वोच्च पुरस्कार

वाचा: दिलीप कुमार यांनी 'ती' मदत केली नसती तर..; इम्रान खान यांनी वाहिली श्रद्धांजली
भारताची घसरण

शक्तिशाली पासपोर्टच्या यादीत भारताची सहा स्थानांनी घसरण झाली आहे. भारत आता ९० व्या स्थानावर आहे. भारतीय नागरिकांना फक्त ५८ देशांमध्येच व्हिसाशिवाय प्रवेश मिळतो. वर्ष २०२० मध्ये भारताचे स्थान ८४ होते. त्यावेळीही ५८ देशांमध्ये भारतीयांना व्हिसाशिवाय प्रवेश दिला जात होता. या यादीत पाकिस्तानचे स्थान शेवटून चौथ्या क्रमांकावर आहे. पाकिस्तान ११३ व्या क्रमांकावर आहे. पाकिस्तानच्या नागरिकांना ३२ देशांमध्ये व्हिसा शिवाय प्रवेश दिला जातो. या यादीत अखेरच्या स्थानावर अफगाणिस्तान असून त्यांच्या नागरिकांना २६ देशांमध्ये व्हिसाशिवाय प्रवेश दिला जातो.

वाचा: अफगाणिस्तानला श्रीमंत करू शकतो 'हा' एक ट्रिलियन डॉलरचा खजिना!

कशी ठरते क्रमवारी?

एखाद्या देशाच्या पासपोर्टधारकांना व्हिसाशिवाय किती देशांमध्ये प्रवेश दिला जातो या आधारावर क्रमवारी ठरवली जाते. यातील किती देश संबंधित देशातील नागरिकांना व्हिसा ऑन अराव्हयलची सुविधा देतात त्यावरून ही क्रमवारी ठरवली जाते. संबंधित देशाच्या नागरिकांकडून कोणताही धोका नाही, अशाच मित्र देशांना व्हिसा ऑन अराव्हयलची सुविधा दिली जाते.