तिघांपासून जन्मलं जगातलं पहिलं बाळ!

मटा ऑनलाइन वृत्त । न्यूयॉर्क

पती-पत्नीसोबत आणखी एका महिलेची गुणसूत्रं घेऊन बाळ जन्माला आल्याचा अद्भुत चमत्कार अद्ययावत तंत्रज्ञानामुळे घडला आहे. मॅक्सिकोत अमेरिकन डॉक्टरांनी या बाळाच्या आईची प्रसुती केली. हा मुलगा एप्रिल २०१६ मध्ये जन्माला आला आहे. न्यू सायन्टिस्ट मॅगझिनने हे वृत्त आज प्रथम दिलं. या नव्या तंत्रामुळे या दाम्पत्याचं आई-बाबा व्हायचं स्वप्न २० वर्षांनंतर पूर्ण झालं आहे.

डॉ. जॉन झांग आणि त्यांच्या चमूनं हा वैज्ञानिक चमत्कार घडवला आहे. या बाळाच्या आईचे गुणसूत्र सदोष होते. परिणामी तिच्या बाळात तिच्या गुणसूत्राद्वारे लेह सिंड्रोम नावाचा मेंदूशी संबंधित विकार जात असे. गेल्या २० वर्षात तिचा ४ वेळा गर्भपात झाला तर दोन जन्माला आलेल्या मुलांचा मृत्यू झाला. जन्माला आलेल्या २ बाळांपैकी एक सहा वर्ष तर दुसरं केवळ ८ महिने जगलं. हे दाम्पत्य जॉर्डनला राहतं.

स्त्रीबीजकोशात मायटोकॉन्ड्रिया म्हणजेच सूत्रकणिका असतात, ज्यांच्यामुळे बीजाला ऊर्जा मिळते. पण या सूत्रकणिका सदोष असतील, तर जन्माला येणारं बाळ लेह सिंड्रोम या मेंदूविकारामुळे दगावण्याची भीती असते. या तंत्राद्वारे मातेच्या बीजातून केंद्रक वेगळं काढलं जातं. ते सुदृढ महिलेच्या बीजातलं केंद्रक काढून त्यात मातेचं केंद्रक सोडलं जातं. तयार स्त्रीबीज पुन्हा मातेच्या बीजकोशात फलित होण्यासाठी सोडलं जातं. अशा प्रकारे दोन माता आणि एका पित्याची गुणसूत्रे घेऊन बाळ जन्माला येतं. म्हणजेच या प्रक्रियेत बीजाऐवजी केवळ बीजाभोवती असलेल्या सूत्रकणिकाच दाता मातेकडून घेतल्या जातात. परिणामी दाता मातेचं गर्भासाठी योगदान केवळ ०.१ टक्का इतकंच असतं. डॉ. झांग यांनी या तंत्राने ५ गर्भ तयार केले. त्यापैकी या बाळाची वाढ नीट झाली. यापूर्वी १९९० च्या अखेरीस हे तंत्र वापरण्यात आलं होतं. पण ते यशस्वी झालं नव्हतं.